Bi 1953 ndwen 7, Vuz Yindoz ndaej 36 bi, de daiq bingh raiz le bonj saw《Dawz Sojmiz Doxgaiq Soengq Hawj Aendangj》gag lwnh ciuhvunz swhgeij, gujli le gyoengq bouxcoz ciuh dem ciuh. Vuz Yindoz dwg bouxhairoen aen saehnieb binggung guek raeuz. De mbouj lau dai, sieng ndaek lai lij buekmingh guhhong, vunz cungj heuh de guh boux “Baujwj·Gohcazginh” Cungguek. De youq ndawsaw sij naeuz:“Cijaeu gou lix ngoenz ndeu, gou couh aeu vih aendangj caeuq lwgminz guh ngoenz hong ndeu.” Bi 1955 ndwen 4 ngoenz 12, Vuz Yindoz youq Cunghyangh Yinzminz Gvangjbo Dendaiz loeg le aen yenjgyangj “Bouxcoz Aeu Baenz- lawz Gungganq Gij Daudwz Binjciz Gungcanj Cujyi Swhgeij”.

Vuz Yindoz: Gij muzdi ndwen- ngoenz raeuz dwg gijmaz? Doiq boux guhgwzming ma gangj de caenh miz aen dapanq haengjdingh ndeu, couh dwg vih lwgminz cauh vuenyungz, gij vuenyungz caencingq haenx dwg yawjraen gij makbaenz de cauh okdaeuj haenx bienqbaenz gij vuenyungz lwgminz, ndigah neix caemhdwg gij vuenyungz ceiq hung de. Bouxvunz miz gij muzdi baenz hungmbwk ndeu ceiq roxriuj vuenyungz dwg gijmaz. Ndigah de couh mbouj goq swhgeij、roengzrengz buekguh、mboujduenh hagsib. Gij vuenyungz caencingq ciengxlwenx liz mbouj ndaej gij swngli yinzminz.

Bi 1917, Vuz Yindoz doekseng youq aen ranz gungzhoj ndeu laeng Gyanghsih Swngj Bingzyangh Si Anhyenz Meizgvang. Saedceij haemz- hoj lai, de menhmenh roxnyinh cijmiz riengz Gungcanjdangj cijndaej fan- ndang、ndaej gaijfang、raen gvangh- mingz. Ciengzciengq Dingjhoenx Yizbwnj bauqfat le, Vuz Yindoz doq gyahaeuj Sinhswginh bae, hainduj guh gij hong binggung dwgrengz haemzhoj haenx. Vihle yienzfat baudan, de deng caq dawz 200 lai mbat, fwngz- swix caeuq da swix cungj deng caq dwk mbouj miz liux, ga’gvaz cix deng caq vej lo, hoeng de lij youq baihnaj buekguh. Haujlai bi gvaqbae lo, Vuz Yindoz ngeixdauq naeuz:“Gou dwg gungcanjdangjyenz, mwh miz yungyiemj seiz aeu ndwn youq baihnaj, mbouj ndaej doi gij hong yungyiemj hawj vunzwnq.”

Vuz Yindoz: Gyoengq bouxcoz gyoengq baengzyoux, raeuz lix youq aen seizdaih hungmbwk ndeu, baihnaj raeuz miz diuz roen hawj raeuz cauh goenglauz、ok geiq ok maeuz hung- gvangq ndeu. Raeuz aeu doiq ndaej hwnj gij ndwenngoenz raeuz, aeu insik gij vuenyungz caencingq, roengzsim guhhong、 hagsib caiq vih lwgminz cauh’ok gij vuenyungz engq hung!

Daj Ciengzciengq Dingjhoenx Yizbwnj daengz Ciengzciengq Gaij- fang, caiq daengz Cungguek moq laebbaenz, Vuz Yindoz youq gak cungj vihhong gwnzde okrengz buekguh gij saehnieb binggung guek raeuz. Vuz Gwz dwg dahlwg Vuz Yindoz, de cungzlij ndaejgeiq coenz vah daxboh de:“Bouxvunz caencingq ndeu, bungzdaengz hojnanz couh aeu hoenx; hoenx ne couh aeu dwkhingz；hingz le cix mbouj ndaej ndaeng- ndieng!”