Bi 1937 ndwen 7 ngoenz 8, ngoenzgonq Yiz- bwnj ngamq fatdoengh “Luz- gouhgyauz Saehbienq”, Cunghgung Cunghyangh fat le《Cunghgoz Gung- canjdangj Aeu Denbau Senhgau Daengx Guek, Bingyizbwnj Hoenxdwk Luzgouhgyauz》, heuh daengx guek yinzminz doxgiet hwnjdaeuj, doengz- caez dingjhoenx Yizbwnj boux ciemq haeuj neix. Caemhcaiq dawz gij gietsim Gungcanjdangj yaek aeu dwk hingz haenx baij hawj vunzbiengz yawj.

Cit densigi 《Mauz Cwzdungh》:

Mauz Cwzdungh: Gou sij le faenh《Cunghgoz Gungcanjdangj Aeu Denbau Senhgau Daengx Guek, Bing- yizbwnj Hoenxdwk Luzgouhgyauz》, seizneix doeg hawj daihgya dingq: Doenghboux beixnuengx daengx Cungguek, Bingz Cinh yungyiemj, Vazbwz yungyiemj, Cunghvaz Minzcuz yungyiemj, daengx minzcuz cungj bae hoenx Yizbwnj raeuz cijndaej ra diuz roen okdaeuj. Yizbwnj seizneix cingq hoenx Cungguek raeuz, raeuz yauhgiuz sikhaek dwk boiz. Caemh yaek miz saehbienq moq lo, raeuz aeu cinjbi ndei, gaej muengh naeuz gyoengqde ndaej caeuq raeuz doxhuz doxndei dem lo.

Cunghgung Cunghyangh senhgau:“Aeu bing hen ndei Bingz Cinh, hen ndei Vazbwz! Mbouj hawj Yizbwnj digoz cujyi ciemq aeu saek conq dieg Cungguek. Hen ndei diegguek, hen daengz dai bae! Daengx guek beix- nuengx、cwngfuj caeuq bangbing yaekaeu doxgiet hwnjdaeuj, aeu minzcuz dungjyiz cuk baenz diuz cangzcwngz gaenjmaenh ndeu bae dingjhoenx bang bingcaeg Yizbwnj neix! Goz Gung song aen dangj aeu caenmaed doxgap, caez dingjhoenx bang bingcaeg Yizbwnj! Gyaep gyoengqde ok Cungguek bae!”

Bi 1937 ndwen 7 ngoenz 8, Gunghgoz Gunghnungz Hungzginh lij fat denbau hawj Ciengj Gaisiz, gangj mingz gij gietsim caez dingjhoenx Yizbwnj. Ngoenz daihngeih, Couh Wnhlaiz、Cuh Dwz guh bouxdaibyauj Cunghgoz Gungcanjdangj caeuq Ciengj Gaisiz raennaj, doxcaez yaeng baenzlawz dingjhoenx Yizbwnj gaeuq Cungguek. Couh yienghneix, gyoengq vunzlai gak minzcuz、gak gyaiq、gak gaihcwngz daengx guek, bouxboux cungj gagnyienh bae baihnaj hoenxciengq. Neix hawj bang bing raeuz engq miz gietsim haenqrengz gaj vunzdig. Neix dwg gij hainduj ciengzciengq daengx guek hoenx Yizbwnj hungmbwk de, caemhcaiq youq baihdoeng seiqgyaiq hai le aen cancangz daih’it hung ndeu bae fanj Fajsihswh.