Singhgiz haj cuengqhag, lauxsae gohyoz hawj dou dauqma ranz guh baez sawqniemh “gyaeqgaeq fouz hwnjdaeuj lo” ndeu.

Youq gwnz roen dauqma ranz, gou doq byaij doq naemj: Gyaeqgaeq guhlawz fouz youq najraemx ndaej ne? Gou buenq ngeiz buenq saenq. Deng lo, Haijdai mbouj dwg hawj vunz fouz youq najhaij mbouj caem roengzbae ma? Gou sim’angq raix- caix, yamq hung byaij dauqma ranz.

Gou caepcawq aen boi ndeu、aen gyaeqgaeq ndeu、daeh gyu ndeu、aen beuzgeng ndeu、ga dawh ndeu caeuq di raemx he gonq, liuxcih gou ndingq gyang boi lai raemx, caiq aeu boi gengz baenz limq 45 doh, aeu gyaeqgaeq swnh henz boi cuengq roengz gyang boi bae, dan dingqnyi “gongdong” sing ndeu, gyaeqgaeq caem haeuj daejboi bae. Ciep roengzdaeuj gou gya beuzgeng gyu daih’it roengz gyang boi bae, gyaeq- gaeq mbouj doenghdanh saekdi, lumj lwgniq ninz ndaek nei; gya beuzgeng gyu daihngeih, gyaeqgaeq lijdwg mbouj doenghdanh, ninz vang youq daejboi. Mboujseih fuengfap gou loek lo? Gou ndawsim miz di gip. Daxmeh raen le, lumhlumh gyaeuj gou naeuz：“Dwg mbouj dwg gyu gya noix lo?” Gou dingq le, gya beuzgeng gyu daihsam, gyaeqgaeq mbouj cingz- nyienh saekdi fouz hwnjdaeuj lo, lumjbaenz lij naemj ninz youq daejboi. Gou raen de miz bienqvaq, sim’angq dangqmaz, yaepyet couh cingsaenz gvaekgvaek. Gou ganjgip gya beuzgeng gyu daihseiq、 beuz- geng gyu daihhaj, raemx ndaw boi noengznwtnwt; gou laebdaeb gya beuzgeng gyu daihroek, gyaeqgaeq fouz youq gyang raemx, lumjbaenz cingq bibuengq mbonqduengq、youh lumjbaenz cingq bibuengq aen- nungxnengh……Cigdaengz mwh gou gya beuzgeng gyu daihgouj, gyaeq- gaeq cij fouz hwnj daengz najraemx, loh byukgyaeq okdaeuj, couh lumj yaek okdaeuj najraemx diemheiq nei, youh lumj yiedcingz dongx gou nei. Gou yungh lwgfwngz anq de roengz gyang raemx bae, yaep ndeu, de youh diubiz fouz hwnjdaeuj lo.

Doenggvaq hwnj muengx caz- yawj swhliu, gou dauqdaej rox lo: Laxlawz, riengz dwk raemxgyu maeddoh gyalai, rengzfouz gyaeqgaeq souh haenx hix gyalai. Mwh rengzfouz iq gvaq rengznaek, gyaeqgaeq couh caem doxroengz; mwh rengzfouz caeuq rengznaek doxdoengz, gyaeq- gaeq couh fouz youq gyang raemx; mwh rengzfouz hung gvaq rengznaek, gyaeq- gaeq couh fouz hwnj daengz najraemx.

O, raeuz gvaq ndwenngoenz, yaek lai naemj, lai guh, cijndaej rox gij aumiz ndawde!

(Gyanghsuh Swngj Suhcouh Si Gauhsinh Gih Swhsanh Saed- niemh Siujyoz Vwnz Gaijgoh)