Gou miz aen daehsaw ceiq gyaez ndeu, de dwg gij laex mwh youwzyenz bizyez hwnj siujyoz daxmeh soengq hawj gou, gou gyaez de raixcaix.

Aen daehsaw neix baihrog dwg saeklamz, yawj hwnjbae bingzciengz dangqmaz, hoeng de maenh- saed naihyungh. Mwngz gaej yawj mbouj hwnj aen daehsaw gou, de miz yungh lai, de raek caix ndaej, raek song mbaq hix ndaej! Aen daehsaw daj it nienzgaep hainduj couh daegbied “gwn ak”, ceiq lai “gwn” ndaej cib bonj saw. Aen daehsaw neix daj it nienzgaep buenx gou daengz seiq nienzgaep, sikhaek couh yaek riengz gou hwnj haj nienzgaep “doegsaw” lo, danghnaeuz mbouj miz de buenx, diuzroen doegsaw gou couh gadog haujlai.

Geiq ndaej miz baez ndeu, gou mbouj siujsim hawj aen daehsaw doek lo, gou siengsim mbouj rox bae lawz ra, youh mbouj gamj lwnh daxmeh. Gou ra gyoengq baengzyoux iq daeuj bang ra, gou ciengz- saeq lwnh gyoengqde gou bae gizlawz gvaq, dou faen baenz sam aen siujcuj, doeklaeng youq bakdou hagdangz ra raen aen daehsaw. Laxlawz mwh cuengqhag gou yawjraen duzma iq ndeu, de dwggyaez lai, gou couh cuengq aen daehsaw roengzdaeuj bae umj duzma, aen daehsaw couh lumz youq bakdou hagdangz lo. Umj dawz aen daehsaw doek le ra ndaej dauq haenx, gou gag roengz gietsim： Baezlaeng mbouj ndaej hawj aen daehsaw doek moq lo.

Moix baez daengz gyajseiznit roxnaeuz gyajseizndat, daxmeh cungj bang gou saeg aen daehsaw, aen daehsaw yaepyet couh bienq moq lo. Naemj daengz haihag gou caeuq aen daehsaw couh yaek doxcaez bae doegsaw lo, ndawsim lijmiz di maqmuengh ne.

Neix couhdwg aen daehsaw gou, gou gyaez de raixcaix. De dwg boux baengzyoux ceiq aeuyungh mwh gou hagsib, caemhcaiq hix dwg gij laex ceiq ndei daxmeh soengq hawj gou.

(Cangh Bozhanz)