Diuzdin mbouj dingqgangj byaij coh bakdou ranz Cinz Dayenz, aen ranz hung haenx miz sam hongq laeg, lij miz laeuzcim, aen laeuzcim dwg daengx mbanj dog he, rog doulaux ndaem miz seiq go faexnganx youh sang youh hung, mwncumcum ndaej raemh benq dieg hung bae, laj gofaex youh liengzsangj youh gig seuqcengh.

Dingqgangj seiq go faexnganx haenx gvendaengz gij minghsoq ranz Cinz Dayenz. Miz bi ndeu daegngeih Cinz Dayenz baenz binghnaek, vunz- mbanj couh fatyienh seiq go faexnganx hung ndawde miz go he reuq lo. Cinz Dayenz vuengmuengz hawj go faex- nganx haenx dwk bwnh rwed raemx, menhmenh go faexnganx haenx youh hoenghhwd hwnjdaeuj lo, doeklaeng gij bingh daegngeih de hix ndei lo.

Lungz Byauh gwnz mbaq gwed faggvak daeuj daengz laj faexnganx hung, ngeix hwnj gij riuznaeuz doenghbaez ndaejnyi haenx, nyaenx mbouj ndaej lai yawj le seiq go faexnganx haenx geij baez. Raq rumz ndeu ci gvaqdaeuj, gij mbawfaex gwnz dingj gyaeuj doxbungq doxgaex ndaej yiengjsasa. Gij ganjfaex baenz- neix hung! Gij mbawfaex baenzneix moengj! Ndwn youq lajde, lumj ndwn youq lajroq nei liengzsangj, seiq go faexnganx neix caen miz di lumj seiq daeglwg Cinz Dayenz, bouxboux sangset……

Miz boux vunz ndeu daj ndaw dou byaij okdaeuj. Lungz Byauh yaek ndoj gaenq mbouj gib lo, boux vunz haenx cingq dwg daegngeih Cinz Dayenz Ah Duj.

“Ah Duj!” Lungz Byauh cijndei nyengh gyaeuj bae dongx.

“Ai! Lungz Byauh! Dingqnyi mwngz dwg ngoenzlwenz dauqma hane?” Ah Duj doq yiedcingz cam doq byaij coh de, bongxbongx mbaq de, ndang gwnz ndang laj cim de, gwnz naj riunyumnyum, ndaej yawjraen Lungz Byauh de gig sim’angq.

“Deng a, haemhlwenz daeng- ngoenz roengz bya seiz cij ma daengz ranz.”

“Haeujdaeuj naengh yaep he?” Ah Duj rag de haeuj dou bae, “song bi neix mwngz dauqdaej haeuj gyawz bae lo? Dingq meh mwngz gangj mwngz bae Yanghgangj lo?”

“Dwg ha, bae Yanghgangj lo.”

Lungz Byauh deng rag haeuj ndaw dou bae lo, aen sim diuq- dwddwd, faggvak gwnz mbaq bienq ndaej naekgywggywg.

(caengz sat)