Bi 1949 ndwen 11 ngoenz 14，mwh guek raeuz dieg baihsaenamz yaek gaijfang seiz，Gyangh Cuzginh boux mimiz gungcanjdangjyenz vutmingh laeng aen Dieggajvunz Cungzging Byagoloz Dendaiz Lanzyah，bi de Cejgyangh ngamq 29 bi. Buenq ndwen gajlaeng，Cungzging gaijfang.

Bi 1965《Ciengxlwenx Lix Youq Ndaw Feiz- haenq》cit denyingj neix dauqyienh le gij cingsaenz mbouj lau dai Cejgyangh.

Cejgyangh：Gaej daej，gyoengq doih hu！Raeuz aeu riu dwk coux swngli.

Cit denyingj neix codaeuz heuhguh《Rin Hoengz》，Couh Wnhlaiz cungjlij yawj sat le couh genyi gaij coh guh《Cejgyangh》，hoeng Yiz Lanz canghheiq cang guh Cejgyangh neix naeuz，gij cawjgak cit heiq neix mboujdan gag miz Cejgyangh，siengliengz baedauq， Couh Wnhlaiz cungjlij daj souj sei Yez Dingj cienggun sij haenx senj aeu“ciengxlwenx lix youq ndaw feizhaenq”coenz sei neix hawj cit denyingj neix an coh. Gyangh Cuzginh couhdwg gij yenzhingz Cejgyangh.

Cejgyangh 19 bi gyahaeuj Gungcanjdangj，bi 1947 seizcin，de riengz Bungz Yungjvuz goenggvan de bae baihdoeng Swconh cujciz vujcangh gijyi. Bungz Yungjvuz youq ndaw bauqluenh vutmingh lo，ngauqgyaeuj de deng vunzdig gvej roengzma venj hwnj gwnz dousingz. Cejgyangh nyaenx dwk sim’ in roengz gietsim ciepguh gij hong goenggvan de. De doiq dangjcujciz naeuz：“Gij gvanhaeh diuz sienq neix caenh gag gou sug lo，gou siengj youq aen dieg Laujbungz dai haenx laebdaeb hoenxguh.”Seizde，daeg lwg dog songde ngamq ndaej bi lai，mwh yaek doxbiek seiz Cejgyangh umj daeglwg de umj dwk gig ndaet， raemxda rihnangnang， caenh baez dem baez cam dah baengzyoux de naeuz：“Mwngz naeuz baezlaeng de majhung le lij ndaejgeiq gij yienghceij bohmeh de dem lwi？”

Bi 1948 ndwen 6，aenvih bouxfanjgoet caegbauq，Cejgyangh ngaiz vunzdig gaebdawz，gij mimiz aendangj de cungj mbouj rox geijlai，hoeng de nyengh naeuz gij mimiz de cungj rox caez. Neix hawj cib lai boux mimiz dangjyenz ndoj gvaq nanh ndeu. Vunzdig saemj bae saemj dauq raen saemj mbouj ok saekdi gihmiz le，hozgaek raixcaix，couh doiq Cejgyangh yungh yiemz hingz，caiq aeu ciemfaexcuk baedauq camz gij lwgfwngz de. Hoeng Cejgyangh daj gyaeuj daengz byai cungj mbouj laeuh saek di mimiz ndawdangj.

Cit denyingj《Ciengxlwenx Lix Youq Ndaw Feizhaenq》：

Vunzdig：Gijmaz？Mwngz bakgeng lai dwg lwi？Mwngz gaej lumz gizneix dwg aen Cungh Meij Hozcozsoj！

Cejgyangh：Gou rox gij coh baihgwnz lij rox gij coh baihlaj，neix dwg gij mimiz ndawdangj dou，gou dai cungj mbouj naeuz sou nyi.

Vunzdig：Mbouj naeuz？Mbouj naeuz caiq hwnj ding， cib lwgfwngz cungj ding caez bae!

Cejgyangh：Ciemfaexcuk dauqdaej dwg aeu faexcuk guh baenz，gij eiqceiq gungcanjdangjyenz dwg gangdiet.

Bi 1949 ndwen 8 ngoenz 27，Cejgyangh caegcaeg doenggvaq Vangz Moucaiz bouxhenlauz neix hawj Cuzanh daegnuengx de sij le fung saenq ndeu. Youq ndawsaenq，cejgyangh louz vah gvendaengz Bungz Yinz lwg iq de：“Muengh son de aeu hwnqguh Cungguek moq guh ceiq，riengz gij rizdin bohmeh de，ciuhvunz cungj buekguh gij saehnieb gwzming Gungcanj Cujyi.”

Bi 1949 ndwen 10 ngoenz 1，Cunghvaz Yinzminz Gunghozgoz laebbaenz，mbaw Vuj Singh Hungzgiz ronghsien ndeu youq baihnaj Denh- anhmwnz swng hwnjdaeuj. Doenghboux gwzming deng gyaeng youq Cungzging haenx rox le cungj gikdoengh raixcaix. Gyoengqde aeu najdenz siuq va hoengz caeuq geij mbaw ceijmaez henjoiq guh le mbaw Vuj Singh Hungzgiz ndeu，caez muengh Cungzging gaijfang ngoenzde vaiq daeuj daengz.

Cit denyingj《Ciengxlwenx Lix Youq Ndaw Feizhaenq》：

Cejgyangh： Cunghvaz Yinzminz Gunghozgoz laebbaenz lo！Gyoengq doih hu，neix dwg aen guekgya raeuz！Mbaw Vuj Singh Hungzgiz youq baihnaj Denh’ anhmwnz swng hwnjdaeuj lo！

Bouxdoih：Cejgyangh！Mwh deuz okbae raeuz caemh aeu miz mbaw Vuj Singh Hungzgiz ba！

Bouxdoih：Deng！Hawj mbaw Vuj Singh Hungzgiz mbinyag youq gwnzdingj Byagoloz！

（Swhliu daj Gungcanjdangjyenz Vangj aeu，gij doz daj gwnz muengx aeu）