Bi 1925 ndwen 5 ngoenz 30，aenmbwn laep- cupcup， fwjbumz yungz- fwdfwd，aen cuhgyaiq Sanghaij fuengzre dwk gig yiemz. Song cien lai boux vunzgangyi youq honghhaw honghgai yenjgyangj、fat cienzdan，byoengq gij saehrwix Digoz Cujyi hai cungq dwkdai gunghyinz、 gaeb lwg- hag okdaeuj. Riengz dwk singcungq ndeu yiengj hwnjdaeuj，diuz Roen Nanzgingh couh bienq dwk lwed- laulau、singsaengsaeng liux.

Denyingj 《Bouxbyaijgonq》：

Vunzlai youzhingz：Aeu fad bouxguhrwix！Vunz Cungguek mbouj lau bikmax！

Bouxgingjcaz Cungguek：Gaej gvaqdaeuj lo！Caiq cung gvaqdaeuj dou couh dwkcungq lubw.

Bouxgingjcaz Yinghgoz：Fire！

Bi 1925 ndwen 5 ngoenz 15，gij swhbwnjgyah Yizbwnj laeng aen Neivai Menzcizcangj Sanghaij mbouj dapwngq gij iugouz hableix gyoengq gunghyinz， lij hai cungq dwkdai le Gu Cinghungz boux gunghyinz daibyauj、gungcanjdangjyenz，vunz- biengz cungj huj dangqmaz. Ndwen 5 ngoenz 30，gyoengq lwghag gak aen hagdangz Sanghaij caeuq gunghyinz foenfoen haeuj laeng co’gyaiq bae siveih youzhingz， hoeng cix deng bang gingjcaz gaebgak hwnjdaeuj liux. Haujlai vunz ndatheiq dwk caenx youq bakdou gingjcazgiz laeng Roen Nanzgingh，heuh gyoengqde cuengq vunz. Bouxgingjcaz Yinghgoz mingz- mingz raen yienghneix cungzlij dwk- cungq gaj dai doenghgij vunz mbouj miz vujgi mbouj miz coih neix. Dangciengz dwkdai le 13 vunz， dwksieng saek cib vunz， gaeb le 150 lai vunz，neix couhdwg aen “Vuj Saz Camj Anq”hawj ndawguek rogguek cungj doeksaet haenx.

Digoz Cujyi gaj le baenzlai vunz，Cungguek yinzminz gaenq haemz yaek dai lo，caen nyaenx mbouj ndaej hu. Ndwen 6 ngoenz 1，Cunghgoz Gungcanjdangj lingjdauj laebbaenz Sanghaij Cungjgunghvei，daengx si hainduj dingz hong、dingz goq、dingz haw liux，bae fanjdui Digoz Cujyi，singseiq gig hung. Doeklaeng，daengx guek gak dieg raen yienghneix caemh foenfoen dingz hong、dingz goq、dingz haw，haeuj yinzminz Sanghaij guh daeuqcwngh bae fanjdui Digoz Cujyi，Sengjgangj Daih Dingz Hong cix youq Gvangjcouh caeuq Yanghgangj bauqfat，gveihmoz gig hung.

Vuj Saz Yindung dwg aen yindung vunzlai gyaez guek fanj Digoz Cujyi hungmbwk ndeu，dwg aen yindung youz Cunghgoz Gung- canjdangj lingjdauj、gaxgonq mbouj caengz miz gvaq ndeu. De dwkceih le Digoz Cujyi，hawj daengx guek yinzminz roxsingj， daihdaih daez- sang le gij cujciz ligliengh gwnz- biengz， hauh’ok gij gauhcauz Cungguek mbat daih’it dagwzming daeuj daengz.