“Ai! Nienzco gou baenz bingh- naek, ninz youq gwnz congz hwnq mbouj ndaej, caeklaiq Siu Cuh de ciengzseiz daeuj ganq gou, caemh- caiq ciq cienz hawj gou ra canghyw、cawx yw, raeuz bae gyawz miz cienz boiz ne? Doeklaeng, bingh gou ndei lo, couh gai gaiq naz haenx hawj Cinz Dayenz boiz caiq, de lij hawj gou lai di cienz ciengx ndang- daej……”

“Seizhaenx Siu Cuh gaenq dwg lwgbawx Cinz Dayenz lo?”

“W!”

“Hw!” Lungz Byauh gaem hwnj faggvak he, roengzrengz daem youq gwnznamh, daj ndaw conghndaeng gyangz sing he okdaeuj.

“Lwg, mwngz mbouj gvaiq meh ba?” Daxmeh de unqniekniek gangj, sing fouzfwdfwd, “meh nyinhnaeuz mwngz yaek canh cienz dauqma, Cinz Dayenz gangj cijaeu ranz raeuz baez miz cienz, de couh gai gaiq naz haenx dauq hawj raeuz.”

“Hei! De couh liuhdingh ranz raeuz mbouj miz cienz rouh gaiqnaz doxdauq!”

Lungz Byauh daenj mauhdiemx, gwed faggvak youq gwnz mbaq baihgvaz, hozhwnj foegfoeg byaij ok rog bae.

Daihcibsam Aulungz- gveiz Gangj Goj (Daihroek)

Daj haemhlwenz maranz daengz seizneix, gij ndaejnyi caeuq gij raen cungj hawj Lungz Byauh mbouj cwxcaih, caen mbouj hab’eiq ha! De youh hainduj niemh Siu Cuh, cijmiz yawjraen Siu Cuh lauheiq de cij angqyangz, youheiq lumj mienh noix raemx ndaw rek nei, unqnemnem caemhcaiq niunwknwk, caen mbouj rox wnggai siengj maz、guh maz.

(caengz sat)