Cunghgoz Gungcanjdangj,

Simnduj angj ndaej mingz,

Hawj dienyah daihbingz,

Lwgminz ndaej fanndang.

Maj youq seizdaih moq,

Saedceij gvaq anningz,

Suhgi Siz Ginbingz,

Gauj duetbinz duetgungz.

Roensuijniz lajmbanj,

Diuzdiuz daengz bakranz,

Laeuz baenz soh baenz hangz,

Youh cang ndaej gyaeundei.

Yamqdin ok bakdou,

Mbouj yungh gienj dinvaq,

Ciiq maenjfafa,

Bae youz da mbouj laep.

Gwn raemx aeu ndaej bienh,

Baihgwnz bued cienz ma,

Ram raemx hwnj dingj bya,

Roeg baq bya cungj angq.

Dajndaem gihgaiva,

Dinvaq mbouj uq naez,

Moux naz buenq siujseiz,

Cae rauq caez seuqsat.

Bouxcoz engqgya ndei,

Mbouj gaem cae gaem rauq,

Roengzrengz gaenxguh dauq,

Canh ngaenz ngauq guh swiz.

Hohhoh ndaem ganhgiz,

Aenaen bizbodbod,

Gyoengq gajceh haeujok,

Ngaenz lumj nye dok ngaz.

Dauqcawq dwg suenmak,

Doxcab mbouj raen haenz,

Moux canh geij fanh ngaenz,

Baenzlawz mbouj baenzmiz.

Ranzranz ciengx bit gaeq,

Gwn raeq dangq gwn dangz,

Nohmou lad liengxhangz,

Caiq cawx rangz ma cauj.

Haeux noh gwn ndaej imq,

Laeuj cimq daemx giz hoz,

Dajndaem aeu gohyoz,

Baenzfouq aeu rox guh.

Lwg doegsaw caen dij,

Ngaenzcienz di mbouj aeu,

Hagdangz mwngz baez haeuj,

Laemxsim daeuj doegsaw.

Mbanjmbanj miz bouxlaux,

Bau miz ngaenz daengz fwngz,

Lumj bouxsien gwnz mbwn,

Daenj gwn mbouj aeu you.

Seizneix guek raeuz hwng,

Goenglauz aendangj hung,

Duetbinz youh duetgungz,

Vuenyungz gvaq ndwenngoenz.

Duetbinz coh siujgangh,

Dangjcunghyangh yinghmingz,

Suhgi Siz Ginbingz,

Raeuz caensim yungjhu.

Ndaej byaij hwnj siujgangh,

Gungcanjdangj okrengz.

Gij roen de daiq deng,

Itsim riengz dangj byaij.