De doq byaij doq naemj, mizseiz ngiengxgyaeuj yawjyawj, sawqmwh roxnyinh gij ranz caeuq suen naz gyae’gyawj ranzmbanj beij song bi gaxgonq lij fwzyauyau, haenznaz maj rim le go’nyaengq gorum, ndaw naz gomiuz mbangcax caemhcaiq reuqhenj.

Mbouj miz raemx! Raemx ndaw dah cungj yaek hawq lo, gizdaej raemxdah bienqbaenz le aen doek aen gumzboengz iq, vunzmbanj gwnz roen bungz cungj mbouj miz cingsaenz, bouxboux doeknaiq swiswi. De gig doeksaet, caezgya youq mbanjranz soqlaiz vuenyungz angqyangz, baenz- lawz bienqbaenz yienghneix lo? Mbouj rox song gaiq naz ndaw ranz bonjfaenh dwg mbouj dwg hix deng hawq fwz lo? Gij haeux ndaw ranz gaeuq mbouj gaeuq bineix gwn ne? Doenghgij saedceij daxmeh dwg baenzlawz gvaq ne?

Haujlai saeh bongh hwnj uk- gyaeuj daeuj, Lungz Byauh camhseiz lumz le gij saeh Siu Cuh, de gaenjgip dauqranz, fouz gyaeuj fouz rieng cam daxmeh:

“Meh, raeuz ndaem naz caengz?”

“Ndaem le gaiq he, hoeng mbouj miz raemx, hai, mehmbwn yaek hawj naz cungj dairemj dairengx lo!” Daxmeh yousim gwdgwd dap naeuz.

“Gou bae yawjyawj.” Lungz Byauh sikhaek daengz laeng dou bae, yaek dawz mauhdiemx caemhcaiq ra faggvak.

“Mbouj aeu bae yawj lo! Cungj dairemj dairengx caez lo, gou gaenq gaij baenz ndaem lwgmaenz lo.”

“Gou hix aeu bae yawjyawj.”

“Lwg, yaek yawj, cij ndaej daengz gaiq naz henz dah baihdoeng bae yawj lo!”

“Gaiq naz henz dah baihsae ne?”

“Gaiq naz haenx, nienzco gaenq gai hawj Cinz Dayenz lo.”

“Baenzlawz? Youh gai naz bae?”

(caengz sat)