Beijfwen Bouxcuengh geij cien bi,

Neiyungz yied si(lwnh) yied singjsien,

Angqhoh laeb dangj ndaej bak nienz,

Sing fwen lienzlienz eu mbouj duenh.

Ruzhoengz hailoh sien hwnjdin,

Dangj daiq bouxminz bongh baenaj,

Doilaemx gwnzbiengz “sam goeng bya”,

Cungguek ronghnaj coh daengngoenz.

Cungguek bouxminz ndaej gaijfang,

Cien angq(docih) fanh angq aendangj raeuz,

Gyo gungcanjdangj guh dongh saeu,

Hawj gaiq boux raeuz ndaej cwxcaih.

Gaijgwz hailangh raeuz sim raeuj,

Bouxminz souhaeuj ngoenzngoenz lai,

Byaij loh fouqmiz dangj daeuj daiq,

Gwndaenj doxgaiq yienghyiengh miz.

Ngoenzneix gizgiz yienghsiengq moq,

Gaiq raeuz Cunghgoz ndei fouzbeij,

Lajmbanj ranzlaeuz cungj hwnj ndaej,

Gij duzroeglaej nanz ra rongz.

Ciuhneix guh vunz caen siuhsaj,

Goenggeq riunaj dawz lingjdai,

Daxbuz betcib goujhungz mai(veh),

Song laux simhai bae diuqfoux.

Haeujlaeg gaijgwz miz hengzdoengh,

Moqnaj engq hoengh engq vuenyungz,

Doengzcaez saedyienh Cunghgozmung,

Giz hoj giz gungz cungj bienq fouq.

Dangj vih bouxminz caen dwg anj(baeg),

Geijlai hojnanh de dingj gvaq,

Vih minz an’onj youq dienyah,

Diuz rap gwnz mbaq naek fanh gaen.

Youq bi duznou ceiq dwg bemx,

Sinhgvanh Feiyenz roengz biengz langh,

Cungguek baengh miz gungcanjdangj,

Dawz gij binghlangh gung roengzbae.

Ceng faen duet miux buetyouyou,

Dangjyenz daiqdaeuz youq baihnaj,

Nyengh dawz binghlah gaemh roengz laj,

Daengx biengz hai naj yawj Cungguek.

Youh guh fuengzbingh youh swnghcanj,

Baengh gungcanjdangj cij ndaej hingz,

Daengq gyoengq beixnuengx lauxbeksingq,

Gaej lumz aencingz aendangj raeuz.

Angqhoh laeb dangj bak bi rim,

Gaiq raeuz bouxminz caen angqyangz,

Vuenyungz cienz baengh gungcanjdangj,

Couhcinj mbouj gangj vunz hix rox.