Ndwen 7 ngoenz 10 banhaemh, Comzyienj Yisuz Cozbinj Daizheiq Maenhndei Gvangjsih Angqhoh Cunghgoz Gungcanjdangj Laebbaenz 100 Hopbi “Ciengxlwenx Riengz Aendangj Byaij” Nem Gaiq Daih Cib’it Comzyienj Heiq——Heiq- cuengh 《Doxduenq Canghvuz》 youq Gvangjsih Vwnzva Yisuz Cunghsinh yienj.

《Doxduenq Canghvuz》 aeu gij ginglig haemzhoj aen dangjcihbu daih’it Gvangjsih——Vuzcouh Cihbu youq bi 1925 ndwen 10 laebbaenz gonqlaeng guh sucaiz, yungh mbangj gwzming senhlez guh giek daeuj cauhraiz, langhbaij le gij funghfan sangndei gungcanjdangjyenz seizseiz vih aendangj caeuq beksingq vutvat sojmiz, gyoengqde yungh mingh caeuq hoenz hengzguh doxduenq, ginggvaq haemzhoj caeuq doxbiek、vutmingh caeuq fanjgoet, ciuqgaeuq daengz dai mbouj bienq giensouj doxduenq, mbouj lumz goeknduj, doeklaeng mboujduenh hwngfat guhhung, hawj mbaw geizdangj ndingfwdfwd youq dieg Canghvuz、dieg Bazgvei mbinfofo.

Gvangjsih miz gij swhyenz saekhoengz、swhyenz lizsij aendangj lai, giekdaej saekhoengz aeu daih daih doxcienz. 《Doxduenq Canghvuz》 cungfaen vatcimh doenghgij ndei neix, aeu heiq gezgou gyaqciq, funggek vaiqmenh ronghsien、yienjok ndei- yawj, caemhcaiq yaem’wenq Heiq- cuengh daegbied gagmiz caeuq gyauhyangjyoz、diuh danqhanh nem lai singbouh habciengq daengj yisuz hingzsik doxyungz ndeindi, langhbaij le gyoengqvunz gwzming miz ceiqheiq hoenghhwdhwd ndeu, yienh’ok le duenh lizsij saekhoengz hawj vunz gamjdoengh ndeu. Gyoengq bouxyawj cungj naeuz, Heiqcuengh 《Doxduenq Canghvuz》 mboujdan dwg ciengz heiq ndeiyawj ndeu, lijdwg dangz ciendaez dangjgo sengdoengh laegdaeuq ndeu, yungh swhyenz saekhoengz gangj ndei gojgaeq aendangj, doidoengh hag lizsij aendangj lix hwnjdaeuj、doengh hwnj- daeuj、hoengh hwnjdaeuj, hawj caez- gya roxnyinh gij raeuj lizsij、dauqngeix haemzhoj, caenh’itbouh giendingh lijsiengj saenqniemh、comz rengz buekguh baenaj.

(Vangz Cunhnanz)