Mboengqneix, Aen Lundanz “Gvangjsih Gyamaenh Gya’gvangq Gij Cingzcik Dieg Guhyiengh Minzcuz Doxgiet Cinbu Daengx Guek Cauhlaeb Dieg Guhyiengh Cukmaenh Gij Eiqsik Caezcaemh Cunghvaz Minzcuz” youz Swcigih Dangjveij Dungjcanbu、Swcigih Minzcunghveij cawjbanh, Gvangjsih Minzcuz Dayoz ciepbanh haenx youq Namzningz Si banh.

“Gvangjsih dwg dieg guhyiengh minzcuz doxgiet cinbu daengx guek, yaek laebdaeb fatok gij cozyung guhyiengh daiqdoengh ndei bae.” Ndwen 6 ngoenz 25, Gvangjsih Bouxcuengh Swcigih Dangjveij Aen- hoih Daengxcungq(Gya’gvangq) Gaiq Daih Cib’it Baez Daihcib doenggvaq 《Gij Gietdingh Gvendaengz Gaijfang Swhsiengj Rapdawz Caenguh Comz Rengz Hwnjguh Aen Gvangjsih Gyaeundei Sevei Cujyi Miz Daegsaek Cungguek Seizdaih Moq》, dinghmingz daezok aeu “gyamaenh haeujlaeg hwnjguh dieg guhyiengh minzcuz doxgiet cinbu daengx guek, cauhlaeb dieg guhyiengh cukmaenh gij eiqsik caezcaemh Cunghvaz Minzcuz”.

Baez lundanz neix muzdiz dwg cungjgez ndei、yungh ndei、hwngfat ndei gij gingniemh ndei dieg guhyiengh minzcuz doxgiet cinbu daengx guek, gangj ndei gojgaeq, gyonj doxrox, guh ndei binjbaiz, gyalai yingjyangj. Lingjdauj caeuq lauxhangz yozcej daeuj camgya haihoih haenx hopheux gij yiyi hungnaek、gohyoz neihanz caeuq saedguh iugouz “Gvangjsih dwg dieg guhyiengh minzcuz doxgiet cinbu daengx guek”, gij gingniemh minzcuz doxgiet cinbu Gvangjsih daengj cawj- daez guh doxyaeng laegdaeuq, caemh- caiq vih diuzroen caeuq banhfap cauhlaeb dieg guhyiengh cukmaenh gij eiqsik caezcaemh Cunghvaz Minzcuz daezok yigen caeuq genyi.

Lauxhangz camgya haihoih nyinhnaeuz, dangguh aen swcigih guek raeuz gyaeujvunz minzcuz vunznoix ceiq lai, gij gingniemh ndei minzcuz doxgiet cinbu Gvangjsih, dwg “gingniemh Gvangjsih” hengzguh aen cidu gizdieg minzcuz gagguenj miz daegsaek Cungguek, doiq hong minz- cuz daengx guek cungj miz camgauj gyaciz. Gvangjsih deihleix vanzging、gizdieg lizsij、lai aen minzcuz cauh- baenz daengj daegdiemj, vih lwnhgangj cukmaenh gij eiqsik caezcaemh Cunghvaz Minzcuz gunghawj le lijlun caeuq hengzguh giekdaej.

Lauxhangz camgya haihoih daezok, wnggai cungjgez ndei gij gingniemh gihbwnj Gvangjsih dangguh dieg guhyiengh minzcuz doxgiet cinbu daengx guek, laebdaeb damqra diuz- roen hab Gvangjsih saedsaeh hwngfat youh ndei youh vaiq, youq cukmaenh gij eiqsik caezcaemh Cunghvaz Minzcuz fuengmienh hamjok yamqdin moq, youq cienzmienh coicaenh caeuq haeujlaeg gak minzcuz dox baedauq doxgyau doxyungz fuengmienh aeu- ndaej dwkbyoengq moq, youq damqra aen suenranz cingsaenz caezcaemh gak minzcuz caeuq laebdingh gij nyinhdoengz vwnzva Cunghvaz fueng- mienh aeundaej dwkbyoengq moq, youq doidoengh doeksaed “cibseiq haj” gviveh caeuq hainduj banhfap moq aen moegbiu loqsiengj bak bi daihngeih fuengmienh hamjok yamq- din moq, doinyoengx hong minzcuz seizdaih moq hamjhwnj mbaeklae moq.

(Veiz Sang’yungz Vangz Veij- yungj Veiz Yingjcinh)