Raemx lae bae heux bya,

Nuengx bae ra fwen doiq,

Saedceij lumj oijmoih,

Doiq dangj cingz mbouj lumz.

Dangj aencingz lailai,

Daengz dai boiz mbouj hwnj,

Bak bi lumj fangzhwnz,

Gwndaenj yungzfefe.

Angqfaengz mbouj lumz dangj,

Gangj dauqlaeng baenz nanh,

Rag haz dang byaek van,

Danq saw mbouj ndaej doeg.

Ciuhgeq saw mbouj rox,

Gyaet hoz mbouj naengzgaeuq,

Daengz cieng noh mbouj laeuj,

Naj nyaeuq lumj duzlingz.

Yienghyiengh mbouj miz gwn,

Lwnh raemxda couh doek,

Nit daengz mbouj miz moeg,

Lumj roeg dai ndaw doengh.

Yied byaij ngaeuz yied daemq,

Aemq baufug youzlangh,

Ndwn youq gwnz bo sang,

Ndaej cuengq ndang youq gyawz?

Ngeix diuq dat bae dai,

Mbwn fwt hai da rongh,

Gaijgwz ndaej guhhong,

Sim rongh lumj daengngoenz.

Dwen daengz guh reihnaz,

Gvanbaz riu doxcoh,

Mbanjmbanj hai goengloh,

Hohhoh ndaej dienh daengz.

Dienh ranzranz ndaej daengz,

Angqfaengz yawj densi,

Cenj laeuj vannini,

Caeuq densi ndoet caez.

Cenj laeuj oemq ndaw bak,

Linx yied cak yied diemz,

Simhai lumj va sien,

Yah ciennienz buh moq.

Gwn ndei caiq daenj ndei,

Dou ranz meiz(miz) roen loh,

Lwgnyez daenj buh moq,

Ciengq go bae doegsaw.

Doegsaw mbouj aeu ngaenz,

Bouxboux gaenx bae hag,

Banhaemh ndaundeiq cak,

Bouxgeq hag cihsiz.

Bouxgeq dwg vwnzmangz,

Hagdangz mbouj ndaej haeuj,

Ndaej loeg’it loegsaeuh,

Cij haeuj ranzhag bae.

Haeuj ranzhag doegsaw,

Dawz gohyoz ndaem ciengx,

Nonsei cien bak sieng,

Ciengq go hwnj ranzlaeuz.

Bouxboux hwnj ranz moq,

Swnghhoz hoengzfehfeh,

Duetgungz mbouj yungh deq,

Veh aen doz mbanj gyaeu.

Hawj bienqbaenz mbanj gyaeu,

Raeuz roengzrengz bae ganq,

Mbouj lau lae lwedhanh,

Ganqhoh suenranz raeuz.

Loekci baenqngaungau,

Haucau yiengjsadsad,

Lajmbanj guh ndaej ak,

Haeux mak gwn mbouj liux.

Cungguek bienq ndaej ak,

Ragfaex bae ndaej gyae,

Byaij hwnj bak mbaek lae,

Maeh ciuhgonq hojnanh.

Gangj daengz goj lizsij,

Mbouj miz vunz ndaej lumz,

Guekcoj bienq ndaej mwn,

Guek wnq mbouj gamj dig.

Minzcuz raeuz doxgiet,

Netsim dingq cunghyangh,

Byaij riengz gungcanjdangj,

Vah gangj aeu guh daengz.