Bi 2017 ndwen 7 ngoenz 31，Siz Ginbingz cungjsuhgi daiq Cunghyangh Cwngcigiz cangzveij bae Sanghaij ngonzyawj aen dieggeq ciengzhoih Cunghgung It Daih. Mwh ngonzyawj seiz， cungj- suhgi sijsaeq yawj le bonj《Gungcanjdangj Senhyenz》. Bonj neix youq gij banj Sawgun 《Gungcanjdangj Senhyenz》 ndawde dwg Cungguek seizneix bonj ce ndaej ceiq caeux ndeu. Bonj saw dijbauj neix dwg daxboh boux gungcanjdangjyenz ndeu yo haeuj mohbangj daeglwg ce roengzma. Siz Ginbingz rox le，naeuz gijneix dij lai，doenghgij vwnzvuz neix dwg gij cwngmingz lizsij，yaekaeu guenj ndei yungh ndei.

Siz Ginbingz：Dij lai，bouxvunz mwngz naeuz ne? （Cangh Yinzya）Gajlaeng baenzlawz yiengh？

Bouxgangjgaij：De aenvih guhhong lai baenz- bingh le，youq Cunghyangh Suhgih dai lo， seizde vunz ndawranz de cungj mbouj rox de gaenq dai lo.

Boux Siz cungjsuhgi dwen daengz haenx heuhguh Cangh Yinzya，de dwg gij gunghyinz dangjyenz Sanghaij boux ceiq caeux ndeu. Bi 1927 “Seiq·It Ngeih Fanj Gwzming Cwngbienq” bauqfat le，Cangh Yinzya roemxdai dawz ndaek bau sawbauq vwnzgen dijbauj aendangj ndeu caegcaeg soengq ma ranzcoj de ——Ningzboh Yazbuj Cin MbanjYaznanz， hawj doxboh de ce hwnjdaeuj.

《Mbouj Lumz Simnduj——Cimhra Cangh Yinzya》 cit heiqgvangjbo：

Cangh Cozgenh：Gij doxgaiq mwngz dawz ma haenx dwg mbouj dwg gij huq aeu mingh ha?

Cangh Yinzya：Dwg ha， boh.

Cangh Cozgenh：Doq coemhsak bae bw？

Cangh Yinzya：Neix cungj dwg gij vwnzgen dijbauj， dij gvaq diuzmingh gou bae.

Cangh Cozgenh：Mwngz lij siengj beq youq gwnzndang ha？

Cangh Yinzya：Mbouj lo，seizneix baihrog dauqcawq gaemh vunz.

Cangh Cozgenh：Daegcenz，mwngz dawz gij doxgaiq neix ce hawj gou ba， gou bang mwngz guenj.

Cangh Yinzya：Yienzliengh gou ba，daxboh，ciuhneix gou caenh nyinh Gungcanjdangj，gwzming hingz le，lwg menh dauqma！

Vih hoh ndei gij swhliu dijbauj aendangj，Cangh Cozgenh gangj byangz naeuz “lwgrwix dai youq baihrog lo”， caiq laeb le aen moh ndeu， yo gij doxgaiq neix haeuj ndawde bae. Daj seizde doxdaeuj，Cangh Cozgenh gag hen aen mimiz hung neix，caemhcaiq hwnzngoenz muengh daeglwg de dauqma，hoeng muengh daengz daengx guek cungj gaijfang liux le，Cangh Yinzya cungj mbouj raen ngaeuz.

Bi 1951，Cangh Cozgenh gaenq lauxgvemgvem lo， de cingj vunz vat aen mohgyaj， gyoengqvunz cij rox gij mimiz hawj vunz doeksaet neix. Gij vunz ndawranz Cangh Yinzya cungzlij dauqcawq ra de，bi 2005，gyoengqde dingjlingz youq 《Saekhoengz Cunghvaz》 mbaw bauqceij bi 1933 Yuiginh Cunghyangh Suhgih daeng haenx yawj raen bien vahdiuqniemh ndeu，cij rox Cangh Yinzya itcig buekguh youq baihnaj gwzming，doeklaeng baenzbingh le couh youq bi 1932 ndwen 12 ngoenz 23 gvaqseiq lo. Mbaw vahdiuqniemh neix haenh Cangh Yinzya guh “bouxbing gwzming ceiq mbeilaux genhgez ndeu”.

Buek vwnzvuz dijbauj Cangh Yinzya aeu mingh henhoh haenx gungh miz 36 gienh. Seizneix youz Gozgyah Bozvuzgvanj、Cunghyangh Dangjanqguenj caeuq Cunghgung It Daih、 Ngeih Daih Geiq- niemhgvanj baujguenj. De vihmaz buekdai cungj aeu hoh ndei doenghgij swhliu neix ne？ Gij lwglan de naeuz， seizde Cangh Yinzya gangj，gij doxgaiq neix baezlaeng haengjdingh mizyungh，de saenq Gungcanj Cujyi itdingh ndaej hingz.

（Swhliu daj Gungcanjdangjyenz Vangj aeu, gij doz daj gwnz muengx aeu）