Bi 2012 ndwen 11 ngoenz 29 gyanghaet，miz boux vunz daegbied ndeu haeuj aen Gozgyah Bozvuzgvanj laeng baihdoeng Denh’anhmwnz Gvangjcangz bae ngonzyawj. Seizde Siz Ginbingz ngamq guh Cunghgung Cunghyangh cungjsuhgi，mwh cazyawj gij langhbaij hung 《Diuzroen Fukhwng》， de fwngz vixhaeuj 《Gungcanjdangj Senhyenz》bonj saw gaeuq neix bae，gangj le aen gojgaeq gvendaengz gij simnduj caeuq sinyangj gungcanjdangjyenz.

Siz Ginbingz naeuz：“Ngoenz ndeu，bouxcoz he youq ndawrug raiz saw raiz dwk gaenx raeuh，daxmeh de youq baihrog hemq naeuz：‘Mwngz gwn haeuxfaengx yaek gya raemx dangznding bw，mwngz gwn caengz?’ De han naeuz：‘Gwn lo gwn lo，diemz yaek dai.’ Hoeng meh de haeuj dou baez yawj，daeg neix caenh goq ngaemgyaeuj raiz saw， conghbak uq raemxmaeg liux. Gwn loek lo，vanj raemx dangznding baij youq baihhenz de mbouj gwn，dauq dawz raemxmaeg gwn cengh lo，hoeng swhgeij cix mbouj rox saekdi，lij naeuz：‘Diemz bw diemz bw.’ Boux neix dwg byawz ne? De couhdwg Cinz Vangdau，mwhnwngq de cingq youq ndawranz laeng Cezgyangh Yi’uh sij 《Gungcanjdangj Senhyenz》bonj saw neix. Ndigah de gangj le coenz vah ndeu：Caenleix gwn hwnjdaeuj diemz raixcaix.”

Bi 1919，Cinz Vangdau ngamq daj Yizbwnj louzhag dauqma， 《Singhgiz Bingzlwnh》 Cazci iu de hoiz 《Gungcanjdangj Senhyenz》. Vihle naebsim hoiz ndei bonj saw neix， bi 1920 ndwen 2，Cinz Vangdau daegdaengq ma daengz Yi’uh Mbanj Faensuijdangz aen ranzmbanj de bae roengzsim hoiz saw. Cinz Vangdau bonjlaiz couh gig siengjgyaez Sevei Cujyi、 gig coengzbaiq Majgwzswh Cujyi，de camgauj banj Yizbwnj，caiq aeu banj Yinghyij ma doiqciuq. De beij baeznaengz engq roengzrengz，caemhcaiq hoiz ndaej engq nanz，bi de ndwen 4，de couh dawz 《Gungcanjdangj Senhyenz》 hoiz liux lo.

Mwh Cinz Vangdau hoiz bonj saw neix，Cunghgoz Gungcanjdangj cingq dwg mwh couzbei cauhlaeb， gij Siujcuj Gungcanj Cujyi foenfoen youq daengx guek gak dieg laebbaenz. 《Gung- canjdangj Senhyenz》 banj Sawgun okbanj le，gunghyinz gaihgiz caeuq bouxroxsaw senhcin haenx cungj gig maij bonj saw neix. Daj neix doxdaeuj，bonjsaw ngamq miz 28000 lai cih Sawgun iqet neix bienqbaenz gij goek swhsiengj Cunghgoz Gung- canjdangj dajcauh sinyangj gwzming.