Moegmienz va hai lumj feiz hoengz,

Lwglan Bouxcuengh gyaez ciengq go,

Angq ciengq hungmbwk seizdaih moq,

Angq ciengq Cunghgoz gyaeu youh lengj.

Haemhlwenz ninz ndaek baenzhwnz loq,

Hai sing ciengq go goksasa,

Ciuhneix guh vunz caen siusaj,

Couh lumj mbungqmbaj mbin luhleh(cwxcaih).

Ngoenzneix dangj raeuz gvaq ngoenzseng,

Beixnuengx doxceng hwnj godaiz,

Raeuz caux beijfwen miz haujlai,

Bouxboux simhai danqhaenh dangj.

It gouj ngeih it youq seizhah,

Lajmbwn lajdeih doengzcaez gaeuj,

Duzlungz baihdoeng fwt ngiengxgyaeuj,

Hoenzfeiz hwnjdaeuj haunengqnengq.

Gyahhingh Nanzhuz hai daihhoih,

Doengh boux doengzdoih sim angqyangz,

Laebbaenz Cungguek Gungcanjdangj,

Vunzlai miz gangj youh miz riu.

Couh youq ngoenzhaenx dangj laebbaenz,

Sikhaek sim haen naemj gouq guek,

Vih gyoengq bouxhoj bingqmingh buek,

Ngoenzlaeng Cungguek cij miz muengh.

Mbouj lau lwed lae caeuq gyaeuj doek,

Mbouj lumz simgoek caeuq sawjmingh,

Gwzming itdingh yaek guh hingz,

Hawj gyoengq beksingq gvaq ngoenzndei.

Fwnfwn rumzrumz bak bi daeuj,

Beksingq yied gaeuj sim yied hai,

Vunz gungcanjdangj ceiq ndei lai,

Mbouj lau mingh dai bae buekguh.

Fanjdung seiqlig ceiq rwixvaih,

Cungq mid doiqdaih aen dangj raeuz,

Gaj vunz couh lumj gaj duzbaeu,

Biengzdeih lwed haeu mbwn laepyaenz.

Vunz gungcanjdangj mbouj lau dai,

Daiqlingx vunzlai hwnjdaeuj hoenx,

Bungz daengz feizmbaw caeuq raemxgoenj,

Ciuqyiengh bae coemj mbouj doiqlaeng.

Ginggvaq haj baez fanj humxhoenx,

Dangj raeuz sonjsaet vunz cien fanh,

Sienghgyangh Canyiz engq hojnanh,

Hungzginh bet fanh yaek bae caez.

Cij lw hungzginh sam fanh lai,

Doeklaeng youh hai bae baihbaek,

Gwn hoj gwn nanh deng caeg gyaep,

Bogfeiz yaek ndaep youq gyang roen.

Cienz baengh Cungguek Gungcanjdangj,

Guh dongh bae dangj hoj caeuq nanh,

Daiqlingx hungzginh daengz Yenzanh,

Geijlai hojnanh gangj mbouj caez.

Miz dangj guh dongh cij ndaej hingz,

Cungguek gwzming hwnj daihloh,

Gyaep fangz Yizbwnj ok Cunghgoz,

Ganj gozminzdangj bae Daizvanh.

Cungguek bouxminz ndaej gaijfang,

Baengh gungcanjdangj daeuj dazyinx,

Gouq raeuz bouxhoj lauxbeksingq,

Gij aencingz de sang gvaq mbwn.

Daengx guek gaijfang guh gensez,

Gij goenglauz de vunz geiq ndaej,

Vih guek vih minz bae naemjngeix,

Hawj gwnz biengzdeih caez vuenyungz.

Gaijgwz hailangh yamq hwnj din,

Dangj vih bouxminz roengz goengfou,

Yungh caenh ligliengh bae fwndou,

Duetgungz baenzfouq minz angqyangz.

Banggungz gunggeng hai loh gvangq,

Baengh gungcanjdangj ok caencingz,

Mboujguenj lajmbanj rox ndawsingz,

Ngoenzneix bouxminz yienghyiengh lengj.

Lajmbanj nungzyez caeuq nungzminz,

Dangj ceiq yunghsim sam yiengh neix,

Raemx dienh goengloh cungj guh caez,

Vunzmbanj sim maez bae codciuh(daengxciuh).

Faex hung roq gyong yiengj gongzgangz,

Va hoengz hai rang rim biengzdeih,

Baengh gungcanjdangj ok simgyaez,

Vunzlai doengzcaez bongh siujgangh.

Dangj Cibgoujdaih lumj feiz oq,

Hai diuz loh moq baefaenfaen,

“Song aen bak bi” dingh guhbaenz,

Cungguek engq haenq youq lajmbwn.

Gomiuz hungmaj baengh raemxraiz,

Gova angjhai baengh ndit daeuj,

Ngoenzneix swnghhoz van youh raeuj,

Cienfanh mbouj lumz dangj aencingz.