Bi 1931 ndwen 11 ngoenz 7, youq ngoenzgeiqniemh Ngozgoz Cibnyied Gwzming 14 hopbi ngoenzde, Cunghvaz Suhveizaih Mbat Daih’it Daengx Guek Daibyauj Daihhoih youq Gyanghsih Yuiginh haibanh. Daihhoih senhbu Cunghvaz Suhveizaih Gunghozgoz Laemzseiz Cunghyangh Cwngfuj laebbaenz, aeu Cunghgoz Gunghnungz Hungzginh guh gij ligliengh vujcangh, caiq senj Mauz Cwzdungh、Cuh Dwz daengj 46 vunz dang bouxveijyenz caephengz cunghyangh, Mauz Cwzdungh guh cujsiz.

Bi 1930 ndwen 10 daengz bi 1931 ndwen 9, gij Hungz It Fuengmienhginh youz Mauz Cwzdungh、Cuh Dwz lingjdauj haenx laebdaeb sam mbat dwksoiq le gij “humx dwk” Gozminzdangj, baihnamz Gyanghsih、baihsae Fuzgen song aen Suhgih couh lienz baenz rangh ndeu. Cunghgung Cunghyangh dingh naeuz baengh aen Cunghyangh Suhgih bae cauhlaeb Suhveizaih Cunghyangh Cwngfuj, hoeng lij caengz dingh ndei youq gizlawz laebbaenz cwnggenz caeuq haihoih. Bi 1931 ndwen 9 ngoenz 28, Mauz Cwzdungh、Cuh Dwz daengj bouxlingjdauj Hungz It Fuengmienhginh Cungjbu daengz Mbanj- yezbingz Gyanghsih Yuiginh cap yingz gvaqhaemh, doeklaeng couh dingh youq aen miuhcoj Ranzse hai Cunghvaz Gunghnungzbingh Suhveizaih Mbat daih’ it Daengx Guek Daibyauj Daihhoih.

Bi 1931 ndwen 11 ngoenz 7 ngoenzde, Mbanjyezbingz daeng ronghsagsag、sing gyonglaz goksasa. Bang bing hungzginh doengh aen dieggaengawq laeng baihsae Fuzgen、baih doengbaek Gyanghsih、baihsae Huznanz Huzbwz、Gingzyaz daengj caeuq 610 bouxdaibyauj Daengx Guek Cungjgunghvei、Daengx Guek Haijyenz Cungjgunghvei laeng dieg Gozminzdangj guenj haenx camgya le daihhoih. Daihhoih doenggvaq le 《Cunghvaz Suhveizaih Gunghozgoz Yenfaz Dagangh》 《Dujdi Faz》 《Lauzdung Faz》 《Vwnhyinh Diuzlaeh》 caeuq gak aen cwngcwz ginghci daengj gietdingh youqgaenj haenx. Mauz Cwzdungh daibyauj Suhgih Cunghyanghgiz yiengq daihhoih guh 《Aen Baugau Cwngci Vwndiz》.

Bide, gyoengqvunz Cunghgoz Gungcanjdangj youq aen miuhcoj Ranzse aeu benj gekok cib geij aen rug genjdanh de, laeb le gouj aen cwngfuj gihgou lumj Vaigyauh Yinzminz Veijyenzbu、Gyauyuz Yinzminz Veijyenzbu daengj. Seizneix gunghozgoz dingzlai gozgyah gihgvanh cungj dwg ciuq gijhaenx ma laeb.

Cunghvaz Suhveizaih Laemzseiz Cunghyangh Cwngfuj laebbaenz, neix cix dwg gyoengqvunz Cunghgoz Gungcanjdangj mbeihung ra、sawq cauhlaeb aen cwnggenz yinzminz gwzming. Seizhaenx de dwg gij haedsim Suhveizaih gwzming daengx guek, doiq dungjyiz lingjdauj、gyagiengz daengx guek suhgih caeuq gij gwzming dem hwngfat bang bing hungzginh ok le haijlai rengz. Gak aen seiz lizsij gajlaeng dem Cunghgoz moq gensez cwnggenz cungj ndaej daj ndawde ra raen gij gingniemh lizsij cix dijbauj cix lai haenx.

(Swhliu daj Gungcanjdangjyenz Vangj aeu)