Bi 1927 ndwen 9, Cunghgoz Gungcanjdangj youq henzgyaiq Huznanz、 Gyanghsih lingjdauj fatdoengh Ciuhsouh Gijyi. Hoeng aenvih vunzdig ak lai, sam loh bing gijyi cungj hoenx mbouj hingz, Mauz Cwzdungh doq gaij dajsuenq mbouj hoenxdwk Cangzsah, caiq aeu gij mingzdaeuz cenzveij suhgi heuh gak loh bing gijyi daengz Liuzyangz Yen Vwnzgyah Si doxcomz.

Ndwen 9 ngoenz 19 haemhde, Mauz Cwzdungh cujciz hai hoih, naeuz lajmbanj vunzdig guenj mbouj daengz baenzlai, bae lajmbanj guh vujcangh doucwngh, baujlouz bingmax, hwngfat ligliengh gwzming. 《Ciuhsouh Gijyi》 cit denyingj neix dauq yienjok le gij lizsij seizde.

Mauz Cwzdungh: Gauj gwzming mbouj miz dieggaengawq couh ndwn mbouj maenh…… Seizneix, raeuz aeu hwnj Byacingjgangh bae ra giz diegndwn ndeu, hawj duivuj mbouj sanq、geizhoengz mbouj laemx. Yienghneix, raeuz couh lumj nyeuqrin iqet nei, Ciengj Gaisiz cix lumj aen gangraemx hung ndeu, miz ngoenz ndeu raeuz aeu fid okbae, dwkbuq aen gang neix.

Aen Ciuhsouh Gijyi dwg Cunghgoz Gungcanjdangj youq Nanzcangh Gijyi doeklaeng aen vujcangh gijyi caemh mizmingz ndeu. Yienznaeuz aen gijyi neix dwksaw lo, hoeng de lij hai le diuz loh moq ndeu, caemhcaiq hainduj miz gij swhsiengj geiqmaeuz hoenxciengq aeu lajmbanj homh hawsingz, vih gaxlaeng Gunghnungz Hungzginh caeuq dieggaengawq gak dieg hwngfat ndaej hung daj ndei giekdaej, dawz gij gwzming seizdaih Cungguek nyoengx hwnj aen gauhcauz moq ndeu.