“Baenzlawz ra loek ne? Gou ra Buzsimjsam bae bang gou guhmoiz.”

“Ha! Deng lo, deng lo,” goeng- geq neix ngaekgyaeuj gwdgwd, gig hojsik gangj, “hoeng mwngz daeuj nguh lo, wnggai caeuxdi daeuj ha!”

“De ne? Baenzneix caeux couh bae le?”

“W! Bae lo, de hwnj bya bae lo.”

“Hwnj bya?”

“W, hwnj bya.”

“Gou bae gyaep de, de byaij diuz roen lawz ne?”

“Daj diuz roen fwngz baihgvaz neix byaij.”

“Gyo’mbaiq mwngz!”

Lungz Byauh yaengx fwngz vad le vad coh boux goenggeq neix, cienq ndang couh buet coh diuz roen fwngz baihgvaz bae.

“Daegmbauq!” Goenggeq daemh dwngx byaij le song yamq coh naj, sing hung heuh coenz ndeu, “mwngz loq daengx yaep ndeu……”

Lungz Byauh ndaejnyi de heuh bonjfaenh, cienq gyaeuj dauqlaeng yawj de, boux goenggeq neix sawqmwh ae’gakgak hwnjdaeuj. Ae ndaej hoz mbaet sing hep, yakyouq dangqmaz, daengx ndang saenqdaddad, dangh- naeuz mbouj miz gaiq dwngx daengj de, aiq mbouj ndaej laebdaeb ndwn youq lo.

“Hw hw……” Ae ndaej caenh he, dauqdaej ae ok gaemz myaizniu he, cij daengx roengzdaeuj, diemheiq fofo vadvad fwngz coh Lungz Byauh.

Lungz Byauh byaij gyawj song yamq, youh simgaenj youh geizheih.

“Daegmbauq, mwngz yaek bae——bae gyaep Buzsimjsam?”

“W!”

“Mwngz gyaep mbouj hwnj lo.”

“De bae ndaej geijlai nanz la?”

“Bae ndaej geijlai nanz la? Ai, Hawj gou geq baez ndeu……”

Boux goenggeq neix laep da, aeu dwngx menhmenh daem youq gwnz- namh.

“De mbouj dwg mbwn lij caengz rongh couh bae ba?”

“Mbouj, de gaenq bae ndaej bi ndeu caiq dem lai ndwen ndeu lo.”

“Maz?”

Lungz Byauh byaengq lwgda hunghadhad, laihnaeuz rwz bonjfaenh vaih lo.

“W, mbouj loek, cibsam ndwen.”

“Goenggeq, mwngz dwg naeuz Buzsimjsam de——”

“De beij gou lij bae gonq lo, lienz gou hix gyaep mbouj hwnj de lo!”

“Ai, neix——”

“Ndigah gou naeuz mwngz engq gyaep mbouj hwnj de lo! De gaenq hwnj bya ndaej bi ndeu caiq dem lai ndwen ndeu lo!”

“Gou rox lo, goenggeq.”

Lungz Byauh saetmuengh ndaej yaek daej youh daej mbouj okdaeuj, liuh mbouj daengz song bi gaxgonq liz ranz seiz, Buzsimjsam lij ndang cangq ndaej lumj duz vaizmeh nei, biz- bodbod, ndwn youq gizhaenx lumj goengq ndoi iq nei, baenzlawz baez yaep da couh dai bae lo?

Baihlaeng youh cienz daeuj gij sing ae ndaej yaek daimbaet, de roxnyinh gig simnyap caemhcaiq gig dwgcaengz, din yamq hunghadhad hoeng ndawsim cix naekgywggywg, byawz liuh ndaej daengz Buzsimjsam “hwnj bya” bae lo, gvaiq mbouj ndaej Siu Cuh haq hawj Ah Gwnh lo. Nanzdauh dwg mehmbwn anbaiz? Roxnaeuz dwg mingh bonjfaenh mbouj miz fukheiq? Neix yaek gvaiq byawz ne? Gvaiq swhgeij? Gvaiq Siu Cuh? Gvaiq Buzsimjsam? Gvaiq bohmeh Siu Cuh? Gvaiq Ah Gwnh Daegseiq Cinz Dayenz? Roxnaeuz gvaiq mehmbwn?

(caengz sat)