Sai:

Nanz mbouj ndaej bae haw,

Okdou raen hoengzva,

Nanz mbouj ndaej raennaj,

Bae guh maz dahnuengx.

Mbwk:

Ngoenzlwenz ndaem duhdeih,

Haetneix ndaem lwgmaenz,

Caet nyied ngoenzndei daengz,

Daeuj caeuq mwngz guh fwen.

Sai:

Sam haet youh bungz haw,

Mwngz guh lawz mbouj daeuj,

Gwnz haw vunz lai raeuh,

Youh mbouj daeuj guh fwen.

Mbwk:

Gofaex youq bangx gemh,

Mbaw seng vih rumzraq,

Doenghbaez fouz buhvaq,

Mbouj miz naj ok haw.

Sai:

Doenghbaez gou hix hoj,

Nanz mbouj rox bae haw,

Seizneix ndaej bienq ndei,

Bae haw guh fwen angq.

Mbwk:

Dangj fuzbinz roengzma,

Bya dah bienq duzlungz,

Seizneix raeuz duetgungz,

Doxbungz daeuj guh fwen.

Sai:

Dangj fuzbinz daeuj daengz,

Lienz duzgaeng hix fouq,

Gaeqmeh caeuq gaeqboux,

Duzduz fwed mbe deq.

Mbwk:

Fuzbinz daengz ranzgungz,

Mou ma cungj hix eiq,

Fuzbinz saedcaih ndei,

Ciengx gaeq bienq duzfungh.

Sai:

Dangj hawj raeuz beixnuengx,

Daigvanj ciengx cwz yiengz,

Hozcozse cien guenj,

Caux cienz lae baenz dah.

Mbwk:

Ciengx cwz yiengz bae gai,

Ndaej ngaenz caiq faenhoengz,

Doihduz ciengx baenz boengj,

Cienz baenz gyoengq haeujma.

Sai:

Gohyoz ndaem nazreih,

Byaleix ciengx ndaw naz,

Sou haeux youh ndaej bya,

Rin sa bienq gim ngaenz.

Mbwk:

Doenghbaez sinhoj lai,

Gwn byaekngaih ciengx mingh,

Seizneix raeuz duetbinz,

Gwn nohcing hix ganx.

Sai:

Seizneix duetgungz gvaq,

Cancan bya caeuq noh,

Buhvaq haiz cienz moq,

Byaij loh lumj mbaj mbin.

Mbwk:

Doenghbaez ndaw bya youq,

Okdou aeu bin dat,

Lumj duznou duzsap,

Raih cag gvaq bangx ciengz.

Sai:

Dangj fuzbinz roengzma,

Bag bya hai goengloh,

Vih raeuz mbouj caiq hoj,

Son raeuz goq giuz gim.

Mbwk:

Heiqci daengz bakdou,

Lienz duzmou hix angq,

Bae haw naeuz bae mbanj,

Naenghci dangq bae youz.

Sai:

Ndaw mbanj doeng gauhdez,

Bouxgeq gyaez bae youz,

Gyanghaet youq Gvangjcouh,

Haemh Hangzcouh ndoet laeuj.

Mbwk:

Seizneix raeuz ndaw bya,

Ranzhaz bienq ranzlaeuz,

Bouxsien gyaez daeuj youz,

Haenh ranz raeuz ceiq ndei.

Sai:

Gonq nanz mbouj roengz fwn,

Ra raemx gwn mbouj miz,

Haeuxyangz dai ndaw reih,

Gaeng dai vih hozhat.

Mbwk:

Seizneix raeuz ndaw bya,

Raemx gag ma daengz ranz,

Miz mieng youh miz dangz(daemz),

Rengx nanz naz mbouj hawq.

Sai:

Dangj fuzbinz daeklig,

Vunzgik bienq vunzgaenx,

Gizgiz bae ra ngaenz,

Bouxgungz baenz bouxfouq.

Mbwk:

Doenghbaez vunz bouxgik,

Mbouj bik bae ra gwn,

Gyanghaet gag rox hwnq,

Guh hong hwngqfoedfoed.

Sai:

Doenghbaez bouxguhnaz,

Mbouj haeuj bya coemh danq,

Bae youzbyaij maranz,

Youh caeuq lan guhcaemz.

Mbwk:

Gvaq giuz mbouj lumz dwngx,

Gwn raemx mbouj lumz cingj,

Dangj hawj raeuz duetbinz,

Raeuz cin(caen) mbouj ndaej lumz.