Bi 1927 ndwen 10 ngoenz 15 gyanghaemh, youq gwnzbam aen coengceiz Ranzyez laeng Huznanz Swngj Yenzlingz Yen Suijgouj Gai, Mauz Cwzdungh fwngzgvaz gaem gienz yaengx hwnjdaeuj, caenndang daiq Cenz Swgi、Lai Yi daengj 6 boux dangjyenz moq senhsi haeuj dangj.

Aendaiz gwnzbam diemj le aen daeng’youzhaeu ndeu, ndawrug caenh miz geij aen daengqraez, faqciengz baihbaek ing aendaiz seiqfueng ndeu, gwnzde daenz le song mbaw ceijhoengz raezseiqfueng venj roengzma haenx. Mbaw ndeu raiz miz “CCP”, gij yinghyij suksij Cunghgoz Gungcanjdangj, mbaw wnq cix dwg gij vahmieng haeuj dangj Mauz Cwzdungh sij haenx:“Vutmingh swhgeij, roengzrengz gwzming, gaihgiz doxdaeuq, fugcoengz cujciz, soujred mimiz, ciengxlwenx mbouj fanjgoet aendangj.”

Bi 1931 ndwen 1 ngoenz 25 gyanghaemh 8 diemj lai cung, Yanghnungzvei Vangz cujsiz daiq song boux cizvei duiyenz haeuj aen ranzcaqyouz bae. Gyoengqde diemj le 3 aen daengdoengzyouz, goemq ndaet dou cueng le couh senhsi haeuj dangj lo. Ngoenzde doengxhaemh, Ho Yezdoj fonj daengz gyanghwnz cungj ninz dwk da mbouj laep. De doq hwnjdaeuj doq ra geuz dawz mbawbaengz demhninz raed vengq ndeu okdaeuj, youq gwnzde maegsij gij vahmieng banngoenz senhsi haenx. Sam bi gajlaeng, mwh hoenx ciengq, de ngaiz sieng le, mbouj ndaej riengz hungzginh bae cangzcwngh, caemhcaiq ra mbouj raen cujciz aendangj, hoeng de lij dawz mbaw sawsenhsi haeuj dangj de yo ndaej gig ndei. Cunghgoz moq laebbaenz le, cunghyangh baiq veivwndonz daengz dieglaux gwzming baihnamz bae, Ho Yezdoj cij gyau mbaw vahmieng haeuj dangj dijbauj haenx hawj bouxdawzrap veivwndonz.

Bi 1982, Cibngeih Daih Aendangj dauq daezlienh gij vahmieng haeuj dangj, mbat daih’it dawz de sij haeuj 《Aen Canghcwngz Cunghgoz Gungcanjdangj》 bae, caemhcaiq gvidingh ndei:“Boux dangjyenz yawhbwh yaekaeu youq dangqnaj fan geiz aendangj guh gij senhsi haeuj dangj”, gij vahmieng haeuj dangj gungh 12 coenz 80 cih caemh daj seizde yungh daengz seizneix, bienqbaenz gij wngqcingz nyinhcaen moix boux dangjyenz.

(swhliu daj Gungcanjdangj yenz vangj aeu)