Bak bi neix fwnrumz doxbuenx, bak bi neix vuet haz vuet em, bak bi neix buekguh baenaj. Ngeuxyawj bak bi lizsij aendangj ronghsagsag haenx, Cunghgoz Gungcanjdangj itloh byaij daeuj gig mbouj yungzheih. Vih angqhoh Cunghgoz Gungcanjdangj laeb ndaej 100 hopbi, geiz neix raeuz geqgangj gij gojgaeq aendangj, dauqun simnduj caeuq sawjmingh, caezsim comzrengz dauq hwnjdin.

Haj Seiq Yindung bauqfat, Majgwzswh Cujyi youq Cungguek cienz ndaej gig vaiq, lumj fwn gvaq rangz did nei, daengx guek gak dieg foenfoen laebbaenz doengh aen “Siujcuj Gungcanj Cujyi”. Bi 1921 ndwen 7 ngoenz 23, Cunghgoz Gungcanjdangj Mbat Daih’it Daengx Guek Daibyauj Daihhoih youq Sanghaij ciuhai. Hoeng seizde hoihciengz deng gij gingjcaz Fazcuhgai souhcaz, ngoenz satbyai youh gaij youq aenruz gwnz Nanzhuz Cezgyangh Gyahhingh bae hai.

《Hai Seizdaih Moq》 cit denyingj neix caiqyienh le gij lizsij ciengzgingj seizde:

Seizneix raeuz cingj Mauz Cwzdungh dungzci doeg gij dangjgangh Cunghgoz Gungcanjdangj.

Mauz Cwzdungh:《Gij Dangjgangh Cunghgoz Gungcanjdangj》: It、Aendangj raeuz heuhguh Cunghgoz Gungcanjdangj. Ngeih、Gij ganghlingj aendangj raeuz dwg: Byawz nyinhdoengz gij ganghlingj caeuq cwngcwz raeuz, nyienh’ eiq doiq aendangj cungsim, cungj ndaej guh bouxdoih raeuz…… Bi 1921 ndwen 8 ngoenz 3 mbwn lij fuemx, gij mwg ndat gwnz Nanzhuz Cezgyangh Gyahhingh cingq menhmenh sanq bae. Aenruz mbouj hung mbouj iq gwnzhuz ndawde cix faenhveiz cingqging yiemzsuk. Cunghgoz Gungcanjdangj Mbat Daih’it Daengx Guek Daibyauj Daihhoih couh youq gij sing daemq “Cunghgoz Gungcanjdangj fanhbi” ndawde hai sat lo.

It Daih Aendangj cingqsik senhgau Cunghgoz Gungcanjdangj laebbaenz lo. Cunghgoz Gungcanjdangj okseiq youq lizsij Cungguek gwnzde hai le aen giyenz moq ndeu. Dajneix doxdaeuj, gij yienghceij Cunghgoz gwzming bienq ndaej moqsaksak, caiq mbouj lumj doenghbaez lo.