Cijaeu gou yawj daengz mbaw gaujgenj haenx, gou couh siengj hwnj baez gaujsi haenx……

Neix dwg baez yijvwnz gaujsi ndeu, hix dwg baez gaujsi gou ceiq simnyap ndeu. Ngoenz haenx, “dinghlingling……” Lingz gaujsi yiengj lo, sing lingz lumj duzfangz coi gou ityiengh: “Vaiq di dap daez, mboujnex seizgan gaujsi couh mbouj gaeuq lo!” Gou gaem mbaw gaujgenj, latyawj mbat ndeu. “A! Miz haujlai daezmoeg cungj caengz raen gvaq, baenzlawz guh ha?” Gou ndawsim siengj, lauxsae gangj doiq lo, gaujsi cungj dwg gij daez dou caengz raen gvaq, bingzseiz lauxsae cij dwg son fuengfap. Dai lo, byawz heuh gou bingzseiz hwnjdangz mbouj nyinhcaen dingq ne! Gou gwj siengj gwj gaenjcieng, buh baihlaeng cungj dumz hanh lo. “Mbouj ndaej yienghneix, aeu caem roengzdaeuj naemj cij ndaej.” Gou roengzrengz hawj aensim swhgeij dingh roengzdaeuj.

Gou fwngz gaem bit, “sa sa sa” sij dwk, geij daez baihnaj couh suenq sij ndaej lo, daez daihhaj miz aen swzyij ndeu mbouj rox sij, sim youh vueng hwnjdaeuj lo, aensim diuq- bubbub. Gou song fajfwngz doxhab, baiq coh gwnzmbwn, ndawsim nam: Mehmbwn ha, gouzgouz mwngz, vaiq lwnh gou dapanq ba! Hoeng, baenzlawz hix sij mbouj ok, ndawsim gip raixcaix. Gou youh iet hoz dauqcawq muengh, fatyienh gwnzciengz banjbauq miz aen swz neix, sim’angq lai lo, sikhaek ciuq cau roengzdaeuj. Yienzhaeuh, daekeiq yawj coh baihlaeng, raen miz di doengzhag sij ndaej beij gou lij menh. Gou youh yawjyawj seizgan, mbouj ndei lo, cij miz 40 faen cung lo, caengz sij cozvwnz ne! Baezneix, sim gou diuq ndaej engq vaiq lo, fwngz saenzdwd, bit ndaw fwngz cungj mbouj dingq gangj lo, cih sij mbeuj lo. Mbouj miz banhfap, gou ngaem gyaeuj roengzdaeuj buekmingh sij, siengj daengz gijmaz couh sij gijmaz, couh lau sij mbouj rim.

Dauqdaej, cozvwnz gou couh lw aen byauhdenj fuzhau lo. “Dinghlingling……” Lingz gyau sigenj yiengj lo, gou aeu seizgan ceiq doeklaeng dawz byauhdenj fuzhau sij hwnjbae le, sikhaek ndwn hwnjdaeuj gyau sigenj. Seizneix, aensim diuqbubbub gou couh lumj ndaek rin hung ityiengh cuengq roengz- daeuj lo.

Baezlaeng, cijaeu gou yawj daengz mbaw yijvwnz gaujgenj neix, sim gou lij dwg gyavaiq diuqbubbub. De hawj gou roxdaengz: Aeu siengj gaujsi mbouj simvueng, couh gauq bingzseiz roengzrengz hagsib.

（bouxlauxsae son’gyauq Cinz Caij- fwnh 指导老师 覃彩芬）