Mwh iq, daxgoeng ciengz gangj: “Cungguek Gungcanjdangj gouq le Cungguek, daiqlingx yinzminz byaij bae coh le swngli, mbouj miz gung- canjdangj, couh mbouj miz Cungguek moq……”Cungguek Gungcanjdangj dauqdaej miz geijlai hungmbwk?”Gou ngeizngwd mbouj roxyiuj.

Doeklaeng, gou yawj le haujlai saw gojgaeq gwzming. Daj gwnz saw, gou roxyiuj le gungcanjdangj daiqlingx Cungguek yinzminz bet bi dingjhoenx, roxyiuj le yinzminz gaijfangj saehnieb ndaej daeuj mbouj yungzheih, gij yiengh gungcanjdangj youq ndawsim gou couh yienhndaej hungmbwk lo. Ndaw《Gojgaeq Leiz Fungh》, boh’au Leiz Fungh gangj:“Youq mwh maj- hung, gij son’gyauq caeuq gungganq dangj sawj gou swhsiengj caeuq gunghcoz mboujduenh cinbu, gou moix di cinbu cungj dwg dangj gvensim bangcoh. Gou, vih dangj caeuq yinzminz seng; vih dangj caeuq yinzminz lix; vih dangj caeuq yinzminz dai!”Gij vah boh’au Leiz Fungh hawj gou doiq Cungguek Gungcanjdangj engq haeujlaeg roxyiuj lo.

Dang yamqdin seizgan daiq raeuz haeuj daengz 21 sigij, youq aen seizdaih moqsag neix, guekcoj raeuz youq langhhung gaijgwz hailangh caeuq hawciengz ginghci nyoenx hwnj lajde, gaenq byaij hwnj le diuzloh gvangqlangh guekgya hungmbwk hoenghhwd, yinzminz fouqmiz.  Dwg ha, raeuz seizneix gwndaenj vuen- yungz caencingq dwg noix mbouj ndaej dangj lingjdauj caeuq gvensim. Danghnaeuz doenghbaez mbouj miz gyoengq gwzming cansw buekmingh dingjhoenx bouxciemqhaeuj, gizlawz miz saedceij vuenyungz ngoenzneix ne? Seizneix, raeuz mbouj you gwn, mbouj you daenj, mbouj you youq, saedceij gvaq ndaej ndei raixcaix. Raeuz dwg daihvunz caijsoq ndeindi ndeu, hix dwg daengzcog caeuq maqmuengh guekcoj. Raeuz wnggai ndeindei doegsaw, gaemdawz gak cungj bonjlingx, vih guekcoj daengzcog engqgya hoenghhwd guh gij gung’yen swhgeij.

Youq Cungguek Gungcanjdangj lingjdaeuj baihlaj, daengngoenz ciuq rongh daihdeih, yiuhhung bonghmbin gwnzmbwn, gyoengqraeuz cuengqmbin loqsiengj gyaeundei! Daengzcog dwg seizdaih gohgi、vwnzva riengjret faz- canj, raeuz yaek guh boux vunz- ciepban miz lijsiengj、miz ceiqyiengq、gouz cinbu、miz cwzyinganj、miz cingsaenz vutmingh ndeu.

(Vangj Loz)