“Song gvanbaz haenx doxnem doxgyaez, seng daeglwg bizbwdbwd, daengx mbanj byawz mbouj hozhaenz Cinz Dayenz lwglan baenzmoengj, cienz ngaenz rim rug?” Daxmeh de cungj yienghneix gig caemdingh gangj, mbouj miz saekdi hozndat roxnaeuz gikdoengh, “lwg, couhcinj Siu Cuh mbouj miz lwgda, hix mbouj haq daengz ranz raeuz daeuj.”

“Mbouj, de couh wnggai haq hawj gou!”

“Gaej gangjbamz.”

“Mbouj, mbouj! Gou mbouj saenq, gou mbouj saenq……”

Hwnzneix, Lungz Byauh byaengq da daengz ranzrongh, mwh ngamq mbwn’wenj, de couh buet daengz bakdou hung ranz Cinz Dayenz, siengj damq Siu Cuh dwg mbouj dwg caen haq daengz ranz Cinz Dayenz guh bawxseiq de lo.

Yienznaeuz mbwn ngamq rongh, baihnaj bakdou hung ranz Cinz Dayenz gaenq miz vunz byaijdoengh lo. Miz vunz rap raemx, miz vunz dajbaet, lij miz vunz riuj aenlamz haeujhaeuj okok, nyaengqfoedfoed guh hoengzsaeh. Cingqngamj miz boux lwgmbwk iq daj ndaw dou diuq hwnj diuq roengz buet okdaeuj, Lungz Byauh fwt rag dawz de, gungj hwet roengzdaeuj cam:

“Ai, ngoenzneix ranz Cinz Dayenz yaek guh maz ne?”

Lwgmbwk iq yawjyawj de, miz di dwglau dap:

“Yaek cingj bouxhek daeuj gwn laeuj!”

“Cingj bouxhek daeuj gwn laeuj guh maz?”

“Daegnuengx ndaej rim ndwen lo!”

“Byawz seng daegnuengx ne?”

“Simjmehveij.”

“Mwngz ndeigyaez lai lo, gij coh Simjmehveij mwngz heuhguh maz?”

“Simjmehveij couhdwg Simjseiq, mwngz mbouj rox ha?”

Ndawsim Lungz Byauh niuj in dwk, dangqnaj mig ndaundeiq, de mbouj saenq gijneix dwg caen, wnggai dwg youq ndaw loq. De gig maq- muengh seizneix dwg youq ndaw loq, de youq Yanghgangj hix ciengzseiz loqraen doenghgij fangzhwnz gvaiq neix gvaq!

De cuengq lwgmbwk iq le, cigsoh buet daengz ranz Buzsimjsam boux bihaenx bang de guhmoiz haenx bae.

“Buzsimjsam! Buzsimjsam!” De youq rog dou sing hung hemq.

Daj ndawdou miz boux goenggeq byom he byaijsaensaen okdaeuj, fwngz ndeu daemh dwngx, daraiz muengh coh Lungz Byauh.

“Mwngz dwg byawz ha?”

“Gou dwg Lungz Byauh, ranz youq mbanj baihnaj.” De gig cigsoh cam, “Buzsimjsam youq ranz lwi? Gou yaek ra de!”

“Mwngz youq mbanj baihnaj? Mwngz ra loek giz luba?”

(caengz sat)