Ngoenzneix banhaet gou bae gwnzhaw cawx byaek, gwnz gai nauhyied raixcaix, dauqcawq dwg gij heiq faengx homfwgfwg.

Banhaemh gwn caeuz le, gou cam mehyah:“Caiq gvaq geij ngoenz dem couh daengz ngux nyied co’ngux, lwgnyez raeuz cuengqgyaj maranz lo, haemhde raeuz yaek gaj bit roxnaeuz gaj gaeq ne?”

Mehyah dap naeuz:“Ndawranz bit gaeq cungj ciengx miz, gaj bit hix ndaej gaj gaeq hix ndaej, naemj gwn maz couh gaj maz.”

Mehyah dingz yaep ndeu youh naeuz:“Mboujnex raeuz bae fanden gwn donq haeux ndeu gvaq ngux nyied co’ngux ba, lwgnyez raeuz baenzneix hung lo, gyoengqde lij caengz ndaej bae fanden gwn caeuz saek baez, mwngz naeuz ni.” Gou ngaekgyaeuj naeuz:“Hix ndaej, hawj lwgnyez raeuz bae yawjyawj seiqmienh hix mbouj loek.”

Ngux nyied co’ngux haemh haenx, dou daengx ranz seiq boux daeuj daengz fanden, diemj le nohbit、nohgaeq、nohcwz gungh caet bet aen byaek, angqvauvau gwn le donq he.

Ngeix mbouj daengz, dou song gvanbaz dwg boux vunz ndaemreih ndaemnaz ndeu, hix ndaej bae fanden gwn haeux, gaxgonq naemj hix mbouj gamj naemj. Seiz iq ranz gou gungzhoj, beixnuengx lai, moix baez daengz ciet mbouj gangj naeuz gaj bit gaj gaeq, ra haeux gwn cungj hoj.

Roxnyinh gou lij iq seizhaenx, miz bi ndeu, yaek daengz ngux nyied co’ngux lo, ranz gou haeux couh gwn sat lo. Miz haemh ndeu mbouj miz haeux cawj caeuz, daxmeh gou bae ra vunzmbanj ciq haeux, hoeng de ciq mbouj ndaej, song fwngz hoengqvauvau dauq. Daxmeh naeuz:“Gyoengq lwg ha, haemhneix mbouj miz haeux cawj caeuz lo, raeuz dumq lwgmaenz gwn ndwi lo.”

Daxmeh doq gangj doq doenghfwngz dumq lwgmaenz. Dou gwn lwgmaenz seiz, rom gij gvamq hwnjdaeuj. Dou gwn sat le, daxmeh couh dawz gij gvamq bae dwk duzmou.

Mbouj geij nanz, daxmeh couh byaij haeuj bakdou daeuj, gwnz fwngz gaemdawz duznou ndeu, de riunyumnyum naeuz:“Baenz lo baenz lo, gwnzmbwn miz lwgda, haxbaenh gou bae dwk mou, duznou neix daeuj caeg gwn mok mou, gou aeu diuz faex baez moeb, couh moeb ndaej de lo. Haemhneix raeuz miz noh gwn lo. Gyoengq lwgnyez, daeuj, raeuz goenj raemx dangq nou.”

Dou geij beixnuengx sikhaek swiq rek coemh feiz. Yaep ndeu, raemx goenj le, dou vaiqvid dawz duznou dangq le, hai dungx gvej saej bae youh swiq ndaej seuqsaksak, couh yaek dwk roengz rek bae dumq lo. Gou nyaenx mbouj ndaej ndwnj myaiz gywggywg. Da raen couh yaek ndaej gwn noh lo, daxmeh cix naeuz:“Gyoengq lwgnyez, gvaq geij ngoenz dem couh daengz ngux nyied co’ngux lo, raeuz mbouj miz ngaenz cawx nohmou, daengz seizhaenx vunz miz noh gwn raeuz mbouj miz, raeuz ce duznou neix daengz haemhde cij gwn ba!” Daxmeh gangj sat couh dawz duznou venj hwnj gwnz diuzsaux vang youq gwnz saeuqfeiz bae. Gou da muenghmyoegmyoeg, raemxda doek roengz gemj daeuj. Daxmeh lumhlumh aen gyaeuj gou, sing unq naeuz:“Lwg ha, daengz ngux nyied co’ngux haemhde, gou hawj mwngz gwn ga nou, daeuj, raeuz bae ninz ba!” Gou doq byaij doq ngeuxgyaeuj yawj duznou venj haenx, ndawsim gig mbouj nyienh.

Seizneix ndwenngoenz gvaq ndei le, ngeix gwn maz cungj miz. Seizneix caeuq gaxgonq doxbeij, doxca lumj mbwn caeuq namh nei. Gyo’mbaiq Cungguek Gungcanjdangj, dazyinx beksingq raeuz yied byaij yied baenaj, yied byaij yied yawj ndaej gij gingjsaek gyaeundei. Bineix cingq bungz Cungguek Gungcanjdangj laebbaenz 100 hopbi, gou daj ndawsim angqyangz, maqmuengh aendangj raeuz yied guh yied hoenghhwd, yied guh yied hungloet, Cunghvaz Minzcuz raeuz ndaej fukhwng, gyo ndaej miz Cungguek Gungcanjdangj. Seizneix guekgya raeuz fouqgiengz lo, lwgminz raeuz aeu rox gij ndwenngoenz neix dwg baenzlawz cij ndaej daeuj, insik gij ndwen- ngoenz ndeindetndet seizneix, engq aeu gaenx hong gwn hoj bongh coh naj.