●Seizneix， Liujcouh Si haenq- rengz hwngfat nungzyez daihneix, gyamaenh gya’gvangq gij cingzgoj vut- gungz gunggeng, doenggvaq canjnieb hawj vunzlai gyalai souhaeuj. Ciuq cam rox, daengx si bineix geiqdoh nduj ndaem haeux ndaem faex ciengx cwzvaiz ciengx bya cungjcanjciz 52.61 ik maenz, doengzbeij gyalai 10.23%. Ndawde, dajndaem guhsat 22.18 ik maenz, doengzbeij gyalai 5.63%.

(Liz Hanzciz)

●6 nyied 11 hauh, Yinhcwngz Yen Vwnzva Gvangjden Caeuq Lijyouz Giz、Yinhcwngz Yen Nungzcunh Sinyungh Hozcoz Lenzse lienzhab banh aen hozdung bouxak doxdax suek faengx “cingz faengx bak bi·nungz sin caemh byaij” angqhoh Cunghgoz Gungcanjdangj laebbaenz 100 hopbi, cienzswnj caeuq fatyiengz gij vwnzva minzsuz cienzdoengj, roxnyinh gij heiqfaenh naekgywd ngoenzciet cienzdoengj.

(Fan Saugvangh)

●6 nyied 11 hauh banhaet, Gvei- gangj Si Cinzdangz Gih youq dieggaeuq Cunghgung Gvangjsih Swngj Daibyauj Daihhoih(Aenhoih Lozcunh) banh aen yizsiz fat cienggeiqniemh “miznaj haeuj dangj 50 bi”, fat cienggeiqniemh hawj 30 boux daibyauj dangjyenz geq haeuj dangj mauhgvaq 50 bi haenx.

(Gauh Canh)

●Daj haiguh hag lizsij aendangj doxdaeuj, Bingzgoj Si aeu gojgaeq lizsij aendangj caeuq fwenleux Bingzgoj doxyungz ndeindet, cujciz canghfwen ndawbiengz bonjdieg, laebbaenz aen- doih eu fwenleux, bien raiz fwenleux saekhoengz hawj vunz haenh, yungh gij hingzsik “yienj eu fwenleux + hag lizsij aendangj” aeu swhyenz saekhoengz、cingsaenz saekhoengz baijyienj hawj bouxyawj.

(Liu Cwngzvanh)