Siujyoz roek bi, gij lauxsae son gou lumj baenz duj baenz duj vameizgveiq nei gyaeundei rangfwd, youq ndaw gij va neix, cix yo miz duj vabeghab hausag caemcingx ndeu, haenx couh dwg Veiz lauxsae.

Veiz lauxsae yienghsiengq gig itbuen, doiq da laeg’yum mboep haeuj ndaw bae, yawj hwnjbae “yiemzsuk dwglau”, hoeng de cix miz di lumj lwgnyez nei hozoiq dwggyaez. Caenhguenj de gangj gij dauhleix hawj gou haenx dingzlai cungj dwg rwz neix haeuj rwz haenx ok. Hoeng, miz song gienh saeh gou lij geiq ndaej gig maenh.

Gienh saeh daih’it dwg veh vehsuijcaij. “Veh vehsuijcaij lo!” Ngoenzde, Veiz lauxsae dawz gij liuh suijcaij de gag aeu cienz swhgeij cawx ma haenx, vad fwngz coi dou. Daeujdaengz meijsuzsiz, dou angqfwngfwng, bu ceijveh ok, boiq ndei saeksuijcaij, henz dou baij rim doengjraemx iq, lumjbaenz dou couh yaek caeuq veh veh hoenx ciengz ciengq ndeu ityiengh. Hoeng, ngamq hainduj veh, ceiqheiq dou couh sied bae haujlai lo. Go’nywj gova yawj hwnjbae gig genjdanh veh haenx, gou baenzlawz veh cungj veh mbouj lumj! Veiz lauxsae youq ndaw geh “va” ndonj bae ndonj dauq (gwnz naj dou uq saeksuijcaij, bouxboux lumj duj va nei), vixvix diemjdiemj, gangjsebseb, nyaengq raixcaix. “Mwngz yawj, ”de byaij daengz henz ndang gou doq vix doq gangj, “mwngz veh gij nywj mbouj dwg diegnywj, dwg go’nywj gwnzndoi bw! Nywj gwnz ndoi couh wnggai mbouj you mbouj heiq majhung, lumj byoemgyaeuj dahsau ityiengh mbinfoux. Go- nywj gwnzndoi baenzneix veh, hoeng, youq mbanjraemx couh mbouj doengz lo. Mbanjraemx, dieg biz raemx cuk, go’nywj couh wnggai noengqnwt heusausau.”De itmienh gangj itmienh gaem fwngz gou, youq gwnz ceij baenz bit baenz veh veh ok gij funghgingj mbanjraemx. Caen geizgvaiq, doengz- yiengh dwg baez daih’it veh, lauxsae veh ndaej caen sengdoengh. “Lwgda dwg aenlaex ceiq ndei gwnz- mbwn hawj raeuz, raeuz aeu hag rox cazyawj, lwgda yawj doenghyiengh lajbiengz, ndawsim yawj saenz- cingz doenghyiengh. Geiq ndaej bw!” Lauxsae riu naeuz.

Gienh saeh daihngeih dwg ganq va. Veiz lauxsae lij gujli dou ndaem va, dou angqvauvau gaen youq baihlaeng lauxsae, bae aeu namh daeuj coq ndaw batva. Gova ndaem mbeuj lo, ciemz okdaeuj lingh ndaem, naedceh roengz mbouj yinz, couh vat okdaeuj lingh roengz……Dou Cingsim dajleix, hawj gova dwk bwnh、 rwed raemx、 gaeb non. Dujva hai ndaej ronghsien rangfwd, duzrwi duzmbaj daeuj ndaw va diuqfoux. Couhsuenq moix ngoenz nyaengq ndaej baegfofo, dou hix sim’angq raixcaix. Lauxsae nyinhcaen doiq dou naeuz:“Gij va neix geijlai gyaeundei ha, neix dwg aenvih sou youq gwnz ndang gyoengqde ok haujlai rengz caeuq hanh.” Gij vah neix yawj daeuj genjdanh, cix hamzeiq gig laeg.

Couh yaek bizyez lo, dou caen sij mbouj ndaej Veiz lauxsae, de youq ndawsim dou dwg ceiq gyaeundei. Veiz lauxsae, mwngz sinhoj lo, dou docih mwngz!

(boux lauxsae son’gyauq Cuh Veimingz/朱卫明)