“Baezneix mwngz dauqma, wng- gai menhmenh ra bawx lo!”

“Lij ra maz dem, nanzdauh Siu Cuh de——”

“Lwg, gaenq gvaq song bi, mwngz lij yienghneix niemh de, hozbiet ne? ”

“Meh, dauqdaej miz maz saeh, mwngz miz vah cigsoh gangj, gaej baenzneix gvax bae gvax dauq!”

“Siengj ndaej hai di, lajmbwn youh mbouj cij miz Siu Cuh boux dahsau ndeu ndwi.”

“De——de haq vunz la?”

“W.”

“Seizlawz?”

“Ndwen gonq gaenq seng laeq lwgsai lo! Ngoenzcog guh laeuj- rimndwen ne! Danghnaeuz mbouj dwg aenvih gwnzbiengz mbouj daiq bingzonj, dingqgangj lij aeu dap daizheiq ciengq 3 hwnz 3 ngoenz hane!”

“O! Haq hawj ranz byawz?”

“Lij miz byawz? Mbanj raeuz ranz ceiq fouqmiz ha!”

“Ranz Cinz Dayenz?” Lungz Byauh cij roxnyinh gij lwedndat cung coh dingjgyaeuj, aen uk bongz ndaej miz di ngunh, “ranz de byawz? Daegseiq?”

“Deng ha! Daegseiq de mbouj dwg caeuq mwngz doengz bi lwi?”

“Ah Gwnh? Ced vunz haenx gangj vah lumj dahsau nei! Siu Cuh mbouj haengj de hane, gou mbouj saenq! Gou mbouj saenq!”

Lungz Byauh daemh din, gaemh gaemxgienz, haeb heuj yiengjcikcik bae.(caengz sat)