Sai:

Biengz neix haj cien bi,

Vunqriz raen yienhsag,

Fukhwng baenz guek ak,

Raeuz angqlag ndawhoz.

Mbwk:

Haeuj daengz seizdaih moq,

Raeuz byaij loh vuenyungz,

Yienghyiengh guh ndaej hung,

Lumj duzlungz mbin bongh.

Sai:

Mwh bak bi gaxgonq,

Guek rog gyonj daeuj hangz,

Yakrwix lumj duzfangz,

Hengzmanz nyoeg beksingq.

Mbwk:

Mwh guek rog daeuj hangz,

Yawj raeuz bamz raeuz huk,

Hak ndaw rog doxyuk,

Dang duzguk haeb vunz.

Sai:

Gyo miz gungcanjdangj,

Okdaeuj dangj fwnrumz,

Mbouj lau ndang deng dumz,

Bued fwjbumz seuqsat.

Mbwk:

Gungcanjdangj caen baenz,

Gwn haemz youh gwn hoj,

Cauxlaeb Cungguek moq,

Hai diuzloh hawj raeuz.

Sai:

Cungguek Gungcanjdangj,

Couh dangq aen daengngoenz,

Ciuq hawj vunz raen roen,

Ndaej sanq hoenz sanq mok.

Mbwk:

Cungguek Gungcanjdangj,

Couh dangq aen daengngoenz,

Ingj ndaej daengx mbwn hoengz,

Rongh doeng sae namz baek.

Sai:

Gungcanjdangj ceiq ak,

Mbwn lak cungj mbouj lau,

Aen haij gamj bae gyauz,

Byaloet ngauz ndaej doengh.

Mbwk:

Gungcanjdangj ceiq baenz,

De maenz guh gwzming,

Vih caux fuk beksingq,

Laeb guh lingh aen biengz.

Sai:

Laeb guek geijcib bi,

Ginghci gauj hoenghhwd,

Guekfuengz guh rengzrwd,

Vunzdig yiep geij faen.

Mbwk:

Laeb guek geijcib bi,

Gizgiz daih bienq yiengh,

Hangzhangz vuenh saeksiengq,

Yienghyiengh guh ndaej ndei.

Sai:

Roegnyanh mbinyagyag,

Duz ak daengh duz yaez,

Guek raeuz guh ndaej bae,

Lij gyaez coengh guek wnq.

Mbwk:

Caezcaez cungj dwg vunz,

Lajmbwn boux baengh boux,

Ndaej doxhuz caemh youq,

Ndaej doxcaeuq baenz ndei.

Sai:

Guekgya ndaej hwngfat,

Byawz hix at mbouj roengz,

Gohgi gauj hwnj yoeng,

Soengz baihnaj seiqgyaiq.

Mbwk:

Mbouj dwg loq fangzhwnz,

Hwnj mbwn caux “Denhgungh”,

Guh “Bwzdouj Hidungj”,

Seiqgyaiq cungj byaengqda.

Sai:

Song bi neix binghraq,

Doxgyuek lah gwnzbiengz,

Guek raeuz lai ancienz,

Dangq saenzsien daeuj hoh.

Mbwk:

Dingj binghraq ndaej hingz,

Lwgminz angqfwngfwng,

Guek raeuz guh ndaej hwnj,

Daengx biengz lwnhfaenfaen.

Sai:

Gungcanjdangj ndei raeuh,

Cinjdeng daeuj banggungz,

Mbouj dan hemq coenz rumz,

Caen duet gungz baenz fouq.

Mbwk:

Gungcanjdangj ndei raeuh,

Caen daeuj gyaez lwgminz,

Raeuz ngeixniemh aencingz,

Laemxsim riengz dangj byaij.