Daengx bi seiqgeiq, yienghceij fwn doek roengz haenx gak sik gak yiengh, bienq bae bienq dauq.

Fwn seizcin dwg saeqsed unq- nem. Naedfwn iqet doek youq gwnz byaifaex, byaifaex did ok ngaz oiqup heuswd; fwn iq doek roengz daemz bae, ndaw daemz hai ok baenz duj baenz duj varaemx.

Fwn seizhah dwg haenqhwd- hwd. Mwh yaek doek fwn, gwnz- mbwn fwj ndaemndatndat, doengx- ngoenz bienq doengxhaemh. Loh byajmig he ndonj gvaq fwjndaem, aeu gwnzmbwn laeprau ciuq rongh lo. Sing byajraez “gunglunglung” yiengj gvaq le, ciengz fwn hung lumj raix raemx nei hainduj raixfafa lo. Fwn hung dingz le, bien mbwn venj hwnj duzdoengz caet saek gyaeundei ndeu.

Fwn seizcou dwg liengzsisi、unqnemnem. Rumzcou daiq fwncou daeuj doek youq gyang naz, gohaeux henj lo, megmax nding lo, gofaiq hau lo…… Fwncou doek youq ndaw suenmak, mak cug lo, fwncou daiq daeuj le gij angqyangz demsou.

Fwn seizdoeng dwg laeglemx yomjyet、gyoetgyat nitcat. Fwn seiz- doeng gab miz naednae, doek roengz ndaw dah, raemxdah giet nae lo. Fwn seizdoeng gab miz naednae, doek youq gwnz ngafaex, ngafaex hai ok baenz duj baenz duj vanae hausag ronghcingx, gyaeundei raixcaix!

Fwn moix aen geiqciet cungj mbouj doxdoengz, miz fwn seizcin saeqsed、fwn seizhah haenqhwd、fwn seizcou liengzsangj、fwn seizdoeng nitcat, gou maij fwn daengx bi seiqgeiq.

(Gyanghsuh Swngj Suhcouh Si Suhcouh Gunghyezyenz Gih Singhcouh Yozyau ngeih nienz- gaep Dauz Singhyui)