Feih ndwencieng, dwg yo youq ndaw gijgwn bimoq haenx lwi?Mbouj, mbouj dwg yienghneix, gij feih ndwencieng de mboujdan yo youq ndaw gijgwn, de lij yo youq ……

De yo youq gij hong bwh gvaqcieng haenx! Mehmbwk ndawmbanj naengzganq haenx caeux couh youq haemhndaep gaxgonq geij ngoenz hainduj dajsaeg lo. Gyoengqde rap buh、denz、haiz、mad daengx ranz, daeujdaengz henzdah dajsaeg, miz mbangj lij gwed rek、bat、guenq daengj daengz henzdah cat swiq dem. Henz dah iq haet daengz haemh cungj dwg vunz, daihgya gangjgangj riuriu, nauhyied dangqmaz. Gyoengq bouxsai couhcinj bingzseiz mbouj guh hongranz, hix gaem sauqbaet daeuj baet ranz baet gij rongzgyau ndaw ranz lo. Youq mboengq seizgan neix, hix hainduj bwh nienzhuq lo. Gyoengq lwgnyez angqvauvau riengz vunzhung bae haw cawx nienzhuq, mwh cawx dangz cawx bingj gyoengq lwgnyez ceiq angq, gyoengqde swnh bouxlaux mbouj louzsim, couh laeglemx gaem dangz bingj oet haeuj ndawdaeh bae.

Haemhndaep feih ndwencieng couh engqgya noengz lo! Gyoengqvunz naengh youq ndaw ranz seuqsak, gwn caeuz haemhndaep. Boux- laux riunyumnyum nep byaek nep noh hawj lwgnyez, gyoengq lwgnyez aenvih gwn dangz gwn bingj lai lo, doiq byaek noh cungj mbouj ngah saek di.Vunzhung gwn laeuj caimax, nauhnauh yiedyied. Lwgnyez gwn imq le hai densi daeuj yawj ndwencieng lenzvanh vanjvei. Ndaw densi gyoengq yenjyenz ciengq go diuq foux, ciepcoux bimoq daeujdaengz. Daengz gyanghwnz cibngeih diemj cung, gyoengq lwgnyez cungj buet ok bakdou ranz bae cuengq bauq coux bimoq. Lwgsai manz diemj bauqrengh bauqciengh, lwgnyez iq diemj bauqhabfeiz, diemj bauqienva, sing bauq yiengj bibi baba, bauqienva youq gyangmbwn haiva ronghsag, gyaeundei dangqmaz, gyoengqvunz yawj gij ienva hoengzhoengz loegloeg gwnzmbwn, bouxboux naj riu angqfaengz. Feih ndwencieng couh yo youq ndaw caeuz ndaep, ndaw bauq yiengj, ndaw angqfaengz gyoengqvunz.

Ndwencieng coit, bouxcoz bae camgya dwkgiuz doxdax, vunzlai hix guhdoih bae yawj dwkgiuz lo. Gou dawz bit caeuq bonjbouh okdaeuj lienh sij cih. Dingq naeuz gij saeh coit guh ndei haenx, ndaw bi ndeu cungj guh ndaej swnh, gou dwg maqmuengh swhgeij lienh baenz gij singq caemdingh, lij muengh gij cih swhgeij sij ndaej ndei! Daxmeh hix naengh youq gwnz eij, dinghdingh yawj saw, daihgaiq de dwg maqmuengh swhgeij bienq ndaej coengmingz ba. De lumj yawj ok gij sim gou nei, riu lo, naeuz:“Itcig roengzrengz, cij guh ndaej ndei!”Gou ngaekngaek gyaeuj. Co’ngeih daengz cibhaj, gyoengqvunz cungj lienzdaemh bae ranz caencik baiqnienz, henz gai luengq ranz, cungj dingqnyi sing hohfuk. Feihdauh ndwencieng couh yo youq ndaw dwkgiuz、 ndaw vunzcaen gangjriu hohfuk haenx.

Ndwencieng mbanjranz, yied daeuj yied miz feihdauh lo, gou hoh daihgya youq bimoq bouxboux bingzan, ranzranz vuenyungz! Gou maqmuengh youq ndaw bimoq, swhgeij rox gamjaen, ndaej cinbu, souhaeuj rimrwdrwd! (boux lauxsae son’gyauq Veiz Bizningz)（指导老师：韦必宁）