5 nyied 21 hauh banhaemh, gozgyah cujsiz Siz Ginbingz han vunz iucingj youq Baekging yungh sibinz camgya Aen Hoih Bouxdaeuz Lwnh- yaeng Gengangh Daengx Seiqgyaiq, caemhcaiq aeu《Dazfwngz Guhdoih Cauhlaeb Aen Veiswngh Gengangh Caezcaemh Vunzloih》guh daez gangj le vah youqgaenj.

Siz Ginbingz naeuz, bi lai doxdaeuj, binghraq bwtndat seiz ndei seiz nyauq, gij binghraq daih doxlah bak bi doxdaeuj ceiq haenq neix vanzlij haenq raeuh bae. Lai vaiq gaemh haeuj binghraq、dauq hawj ginghci gyahwnj, dwg gij hongsaeh ceiq haenq ceiq daeuz seiqgyaiq gak guek. Gij cwngzyenz Aen Cizdonz Ngeihcib Guek wnggai youq daengx seiqgyaiq doxgap dingjfuengz bingh- raq ndawde dawz hwnj diuzrap, haenqrengz gyaak bonjsaeh hai banhfap wngqdoiq ndei gij saeh- gienh goenggungh veiswngh fwtfat hungnaek. Siz Ginbingz ok 5 aen yigen, baudaengz dingjmaenh dangq lwgminz ceiq daeuz、dangq minghvunz ceiq daeuz; dingjmaenh ciuq gohyoz guh, cingjdaej suenqveh ok baenz roix baenz rangh banhfap guh; dingjmaenh doengzcaez okrengz, iuheuh caezhoz gapguh; dingjmaenh goengbingz hab- leix, lid “ciengz haengj dingj bingh”bae； dingjmaenh yw goek caemh byai, hawj aen dijhi ceihleix caezcienz daengj. Vihliux laebdaeb haeujcoengh daengx seiqgyaiq caezhoz dingjfuengz binghraq, Siz Ginbingz gangj gij vah suenqsoq hungnaek, baudaengz cieplaeng 3 bi dauqndaw, Cungguek caiq ok 30 ik maenz meijyenz haeuj- coengh gak guek, yungh daeuj haeujcoengh aen guekgya cingqcaih hwngfat de dingjfuengz binghraq caeuq dauqfuk hwngfat ginghci ndawbiengz; Cungguek gunghawj seiqgyaiq 3 ik faenh yizmyauz gvaq, coglaeng vanzlij langh rengz caez gunghawj yizmyauz lailai dem; Cungguek haeujcoengh gij giyez yiz- myauz bonj guek soengq gisuz hawj aen guekgya cingqcaih hwngfat, doxgap swnghcanj daengj.

Siz ginbingz youq doeksat dawz- naek naeuz, gyoengq raeuz dazfwngz caemh guh, guhdoih doinyoengx cauhlaeb aen veiswngh gengangh caezcaemh vunzloih, guhdoih dawz- hoh vunzloih coglaeng gengangh ndeindet!（Sinhvazse）