“Hix mbouj dwg, Buzsimjsam gangj daxmeh Siu Cuh ndangdaej mbouj daiq ndei, daegnuengx de lij oiq, hongranz caeuq hongnaz cungj aeu miz vunz guh, ndigah siengj ce Siu Cuh lai youq ranz song bi dem, caj daengz de ndaej 19 bi caiq gangj.”

“Dahraix?”

“Gou naemj coenz neix aiq dwg caen.”

“Baenzneix hix ndei.”

Lungz Byauh nam dwk, daxmeh lij nyinhnaeuz de doiq Siu Cuh mbouj miz eiqsei lo, gig sim’angq, riu dwk lumh mbaq daeglwg, danq gaemz heiq ndeu naeuz：“Gangj ndaej hix deng, bohmeh de yaek ce dahlwg youq ndawranz song bi, raeuz lij caj de song bi? Caiq yawjyawj dahsau ranz wnq, gvaq song bi gou aeu umj lan lo, mwngz naeuz deng mbouj deng?”

Lungz Byauh mbouj siengj caeuq daxmeh de lai gangj lo, aenvih de rox daxmeh de gig saenq sawmingh, mbouj nyienh aeu Siu Cuh guh lwgbawx, byawz ndaej rox de caeuq Siu Cuh song boux cungj miz cingzeiq lo, ciuhvunz neix baenzlawz ndaej doxbaen ne?

Ngoenz daihngeih, Lungz Byauh caenndang buet bae ra Buzsimjsam, gouz de lwnh geij coenz vah hawj Siu Cuh, aenvih de saedcaih mbouj ndei caiq bae ra Siu Cuh lo.

“Gangj maz vah? Gou itdingh coenz he hix mbouj lauq bang mwngz lwnh hawj Siu Cuh.” Buzsimjsam sikhaek dapwngq lo.

“Cingj mwngz lwnh hawj de, gou caj de song bi!”

“Ha? Mwngz yaek caj de song bi?”

“W!” Lungz Byauh haeb naeng- bak, ngeix le yaep he, ciepdwk naeuz, “vihliux hawj bohmeh de mbouj miz vah gangj, gou sikhaek bae Yangh- gangj.”

“Ai, mwngz bae Yanghgangj guh maz?”(caengz sat)