Sauhneix doeg sei ciuhgeq, doeg daengz haujlai sei dwen daengz hoenzfeiz lajmbanj, ndawsim gou fwt doengh, cuengq saw roengzdaeuj, caemcaem naemjngeix, siengj hwnj mbanjranz yo youq ndawsim gig nanz, engq siengjniemh gij hoenzfeiz dajcawj mbanjranz biungeungeu.

Youq ndaw uk gou, cungj miz aen conghheuq he daj ranzhaz baihlaeng iet hwnjdaeuj, haethaet haemhhaemh, gij hoenzfeiz dajcawj baenz geu baenz geu, daj conghheuq biu hwnj mbwn bae.

Hoeng, mwh iq, hoenzfeiz swng hwnj, mbouj itdingh couh naeuz miz doxgaiq cawj gwn, hoeng daihgya lij dwg muengh. Mizseiz gou lij cingq saetmuengh seiz, daxmeh fwt daj ndaw daeuh feiz saiq aen song aen lwgmaenz okdaeuj, faen hawj cej- nuengx dou geij boux, hawj dou angqvauvau byongh ngoenz.

Haetromh, hoenzfeiz doiq dou daeuj gangj mbouj miz maz. Aenvih youq seizde, lwgnyez mbouj rox ngaizromh dwg maz. Haetromh miz hoenzfeiz, mboujgvaq dwg daxmeh ndat raemx swiqnaj, de aeu mbaw sujbaq rengqratrat he uet naj gou, uet bae uet dauq, lumjnaeuz yienghneix couh ndaej hawj gou dungx mbouj caiq iek nei. Bang gou uet naj sat, daxmeh yawjyawj aen rekdiet hoengq- hathat, danq gaemz heiq he, bek aen daehsaw gou naeuz:“Bae ba, youq hagdangz aeu dingq gij vah lauxsae, dauqma gou couh cawj souhgwg hawj mwngz.” Gou baez dingq, couh angq- vauvau aemq daehsaw bae hagdangz lo.

Mwh cuengqhag, gyoengq doengzdoih dou iek ndaej dungx hemqgugu, hoeng, aenvih yawjraen ranzhaz baihlaeng gizgyae swng hwnj gij hoenzfeiz ngeungeu, couh lumj nyouq daengz gij feihhom haeuxbyaek nei, hawj dou bonjlaiz mbouj miz rengz byaij naiqnueknuek, nyaenx mbouj ndaej buet coh ranz bae. Mizseiz daengz ranz le lienz byaekheu cungj mbouj miz, cij miz vanj cuk gwn, hoeng doiq dou daeuj bbngangj, neix gaenq dwg gij ceiq ndeigwn gwnzbiengz lo.

Gij ceiq yaeuh vunz dwg gij hoenzfeiz banhaemh. Hoeng, caen aeu mingh, cuengqhag le gij hoenzfeiz ndawranz mbouj sikhaek mauh ok- daeuj, dou iek yaek dai, lij dwg aeu bae gip byaekmou gip ganjhaeux- yangz, dauqranz le cij ndaej caux feiz cawj ngaiz. Daengz gyanghaemh, yienznaeuz hix dwg gwn souh, hoeng, daxmeh nanz mbouj nanz couh youq ndaw souh gya di lwgbiek、lwggva, hawj dou gwn ndaej diemzswdswd. Bingzseiz noh gig nanz miz, daengz cieng gvaq ciet boux he ndaej gaiq song gaiq nohbiz couh suenq ndei lo. Mizseiz miz vanj lwgsae daxmeh bae ndaw naz gip ndaej, mizseiz lij miz gij nohnyaen daxboh daj gwnz bya dwk ndaej dauq. Doenghgij neix cungj dwg youq donq caeuz cij ndaej gwn, daengx ranz vunz humx youq henz congz gwn ndaej lumj gvaq cieng nei vuenheij.

Gij hoenzfeiz gwn cieng geij ngoenz de ceiq hawj dou vuenyungz. Daxboh cawx daeuj song sam gaen nohmou, yied biz yied ndei, caux feiz le, dawz nohbiz venj hwnjdaeuj guh nohlab. Guh nohlab, gij hoenzfeiz ndawranz baenz ngoenz baenz hwnz mbouj dingz. Cuengqhag seiz, youq rog ranz couh nyouq ndaej ndaw hoenzfeiz daiq miz gij feihhom nohlab. Nohlab sij mbouj ndaej mbat he gwn liux, nanz mbouj nanz, daxmeh gvej gaiq iq he roengzdaeuj, faeg ndaej saeqsaeq cuengq roengz ndaw byaek bae, daengx ranz vunz couh diemz- subsub gwn hwnjdaeuj. Bingzseiz yienznaeuz mbouj ndaej gwn noh, Hoeng moix baez muengh gij nohlab henjngaeuh youzrongh, dingq gij sing gij haj nohlab doekcaek roengz ndaw feiz bae fat ok sing “swsw”, gou roxnyinh hix dwg cungj yiengjsouh.

Baihgwnz dwen daengz gij hoenzfeiz dajcawj ndawranz, seiz iq gou lij miz gij hoenzfeiz dajcawj gyangdoengh. Ngoenzsinghgiz, geij boux doengzdoih dou doxciuz bae gwnz bya raemj fwnz. Daihgya cungj maij caeuq Daeglungz bae, aenvih de rumh bya ceiq sughangz, riengz de rumh bya hix ndaej ceiq lai. Aenvih mbouj ndaej gwn ngaizromh, song vanj cuk haemhgonq gwn gaenq bienq- baenz nyouh baiz okdaeuj lo, dungx iek raixcaix, youq gwnz loh bae dwk fwnz, Daeglungz couh daiq dou bae rij ra bya, mo ndaej bya dou couh bae ra fwnz daeuj caux feiz, youq gwnz feiz gangq bya. Gij bya gaeb ndaej mbouj lai, hoeng lainoix ndaej hawj dou gwn le miz rengz bae dwk fwnz. Seizneix, raen gwnz daiz miz buenz nohbya, gou cungj dauqngeix gij feizhoenz ngeungeu youq gyangdoengh, bang lwgnyez dou youq henz riuriu gangj- gangj gangq bya……

Hoeng, miz di doxgaiq cungj rox riengz seizgan lizbae bienqbaenz lizsij. Mbouj rox daj seizlawz hwnj, gyoengq beixnuengx mbanjranz menhmenh yungh saeuqheiqmeiz caeuq cauq- dienh…… Yienghneix, Gij hoenzfeiz hawj gou sug hix menhmenh siu bae lo. Mboujgvaq, gij hoenzfeiz gwnz ranz laeng gou biu ndaej ceiq nanz, daxmeh naeuz gij haeuxbyaek yungh fwnz daeuj cawj cij ndeigwn, yienghneix de boux ndeu laebdaeb aeu fwnz cawj haeux, bouxlawz gienq hix mbouj miz yungh, cij ndei bang de bwh fwnz. Daxmeh genhciz haj roek bi le, aiq dwg raen dou bae raemj fwnz mazfanz lai ba, de couh riengz yungh saeuq- heiqmeiz lo, gij hoenzfeiz gwnz ranz daj seizneix hwnj hix menhmenh siu bae lo.

Bineix ndwencieng dauqbae ranz gvaq cieng, aenvih miz binghraq, miz ngoenz song ngoenz mbouj miz vunz soengq guenqheiqmeiz, yienghneix youh ra fwnz daeuj ndaengjfeiz, geu hoenzfeiz dajcawj ndeu youh daj gwnz ranz swng hwnjdaeuj lo. Ndwn youq rog ranz yawj gij hoenzfeiz sug youh najseng, gou youh lumj dauqma seiz iq lo, lumj yawjraen gyoengq doengzdoih youq henz rij ndaengjfeiz……

Ai, gij hoenzfeiz ranzcoj dwg cungj foux ciengzseiz diuq youq dingj ranz he, cungj youq ndawsim boux youzbyaij youq diegrog riengjret diuqfoux; gij hoenzfeiz ranzcoj youh lumj diuz rij ngutngut ngeujngeuj ndeu, cungj youq ndawsim gou “ding doeng” yiengj mbouj dingz; gij hoenzfeiz ranzcoj lij lumj duj va ciengz hai ndeu, ciengxlwenx mbouj rox reuq bae!

Gvaq ciet sat yaek ma yienh- singz, daj ndawranz naengh ci okdaeuj seiz, gou youh sibgvenq muenghyawj aen mbanj menhmenh liz gyae, gou maqmuengh ndaej yawjraen gij hoenzfeiz geu bae geu dauq. Hoeng gou youh saetmuengh lo——Hoenz- feiz dajcawj menhmenh siu bae gizgyae lo, gij ndwenngoenz mwh iq gou hix siu bae gizgyae lo, hoeng, youq ndawsim gou, geu hoenzfeiz mbanjranz mbouj siu bae gvaq, ciengxlwenx mbouj rox siu bae!