Seizgan lumj naq, biu baefafa, byoem daxmeh mbouj rox seizlawz bienq hau lo.

Daxmeh gou doiq byoemhau gig nyapnyuk gig haemz. Miz seiz gou cingq guh yiengh saeh he, sawqmwh deng de heuh bae, bang de ciemz byoemhau, cungj saeh neix gingciengz guh.

Vunz naeuz byoem hau le gaej ciemz, mboujnex yied ciemz yied maj lai, hoeng meh gou couh dwg mbouj hawj diuz byoemhau coeg da haenx lai ce youq gwnz gyaeuj ngoenz ndeu.

Moix baez meh gou heuh gou ciemz byoemhau, gou cungj gig mbouj naihfanz, aenvih byoem bonjlaiz couh dinj, byoemhau gig nanz ciemz roengzdaeuj, diuz byoemhau ndeu cungj ciemz haujlai nanz cij ciemz ndaej. Ciemz dwk ciemz dwk, gou couh simnyap lo, siengj vaiq di deuz- bae, hoeng gou youh mbouj gamj, cijndei lauxlaux saedsaed bang de ciemz byoemhau.

Geij ngoenz gonq, gou youh deng daxmeh heuh bae ciemz byoemhau. Gou byaij daengz henz daxmeh, hainduj ra byoemhau. Mbouj doengz haenx dwg, byoemhau daxmeh mbouj lumj doenghbaez nanz ra raen, cix dwg miz haujlai lo. Bouxwnq cungj naeuz meh gou mwh coz gyaeu lai bw, byoemgyaeuj youh ndaem youh wenj.

Byoemhau daxmeh youq laj ndit, yienhndaej engqgya coegda. Yawj baenz diuz baenz diuz byoemhau, sim couh lumj deng cim camx gvaq nei, inyubyub, raemxda aeng youq gvaengzda. Hwnzngoenz sinhoj guh- hong, hawj daxmeh caeuxcaeux couh miz byoemhau lo, vih aenranz dou, daxmeh guh ndaej sinhoj lai lo, daxmeh mboujdan nyaengq guh hongnaz, lij nyaengq guh hongranz. Mwh gou doegsaw cinbu le, daxmeh couh gujli gou; mwh gou doiqlaeng le, de ciuqyiengh riu dwk caeuq gou gangjgoj. Geijlai maqmuengh gij byoemhau de dauq bienq lumj doenghbaez nei ndaemndat ha.

Baezneix gou caiq mbouj lumj doenghbaez nei mbouj naihfanz lo, gou sijsaeq aeu byoemhau baenz diuz baenz diuz ciemz roengzdaeuj, yienz- naeuz gou rox ciemz le lij dauq maj okdaeuj, hoeng ceiqnoix ndaej hawj daxmeh sim’onj di. Byoemndaem bienq byoemhau, seizgan mbouj caj vunz ha.

Rog cueng ci daeuj raq rumz liengz ndeu, biengj hwnj gij siengj- naemj gou. Youq ndaw seizgan lumj raemx lae neix, nanzlumz byoemhau daxmeh!

(Anhveih Swngj Gucin Yen Sungden Cunghyoz caet (it) ban Cuh Muzyej)