Ranzmbanj dwg aen mbanj iq mbouj okda ndeu, mbouj lumj ndawsingz hoenghhwd nauhyied, cix hawj gou siengjmuengh. Ranzmbanj mbouj miz laeuzhung laeuzsang, miz haenx dwg aen eijgaeu ndeu youq ndawhongh, gwn ngaiz gvaq le naengh gwnzde cwxcaih ngauznged dak ndit doeg sei; dwg yiengjsouh raemx dumh gvaq hozga youh cingqndei caij youq gwnz rin ndat; dwg mwh ndaejhoengq byaij gvaq loh rinreq, yaeng’yaeng lumh vacwx henz loh. Neix couh dwg gij gyaeundei ranzmbanj, gou couh dwg youq laj dinbya heuyau ndit dak neix, cingqsaed yawjraen yiengh gyaeundei neix.

Goengda gou daj iq couh youq ranzmbanj majhung, caencaen cingq- cingq dwg bouxguhnaz ndeu, seng youq ranzmbanj maj youq ranzmbanj, moix baez gou baema, vaiqhaemh cungj yawjraen goengda gwed hong- dawz miz di myaex haenx, riuj geij bog byaekheu, gungj aenhwet, geu buh- mbangjmbaek bad youq gwnz mbaq, miz mbangj giz cungj loh gyaeujmae okdaeuj lo, miz mbangj giz bienq henj lo. Ndithaemh dak youq gwnz mumhhau caeuq najnyaeuq goengda,lumjbaenz yaek dawz gyoengqde yaenq youq gwnzmbwn. Gou naengh youq najranz, yawj gingjsaek laj ndithaemh bouxguhnaz dauq ranz, nyaenx mbouj ndaej danq sing ndeu: Goengda gaenq geq lo! Hoeng cix youq ndawsim maij fuk veh neix, neix couh dwg gij gyaeundei guhhong, gou couh dwg youq laj yiemhranz daemq- ded ndithaemh dak neix, cingqsaed yawjraen yiengh gyaeundei neix.

Goengda youq mwh ndaejhoengq, maij ndaem va, de moix baez dwk dienhvah hawj gou cungj noix mbouj ndaej dwen daengz gij va de dang baenz baujboiq haenx:“Sou itdingh daeuj yawjyawj, va hai ndaej gyaeu lai lo!” Gou moix baez ndawsim cungj miz cungj maqmuengh he daeujdaengz ranzmbanj, hoeng moix baez ma daengz va gaenq reuq lo, gou saetmuengh dangqmaz, nyapsaebsaeb, ndawsim siengj: Goengda mingz rox mwh gou daeuj va gaenq reuq, lij yienghneix gangj, neix mbouj dwg yaek hoz ngah gou ma. Siengj daengz mbouj ndaej yawj va hai gyaeudei, gou hixnaengz ndoj haeuj ndaw rug bae yawj saw, da mbouj raen sim mbouj nyap. Geij baez le, gou gaenq doiq ndaej yawj va goengda ndaem haenx mbouj miz maqmuengh lo. Dang gou caiq baez daeujdaengz ranzmbanj, lij caengz roengz ci, couh yawjraen goengda gyae’gyae vadfwngz coh gou, gou ngamq hai douci, goengda couh rag gou gvaq henz he bae, daj ndaw daeh mbon ok soujgih, fwngz mbouj lingzvued bued aen soujgih, ra ok geij mbaw siengq va de ingj haenx, baihndaw miz vagut yienghsaek damh, vameizgveiq hoenghhwd, vasozyoz caemdingh, gou yawj haeujmaez lo, youh yawjyawj goengda, mbouj dandan gamjdaengz gamjdoengh, goengda mboujdan vih gou cauhguh gyaeundei, engq sawj gou cingqsaed yawjraen gyaeundei.

Soujgih ndaep haujlai nanz haenx sawqmwh rongh lo, dwg goeng- da fat saenqsik hohfuk bimoq hawj gou, swnhbienh fat mbaw siengq vasozyoz ndeu, gou lumjbaenz yawj- raen goengqbya gyaegigi lumj aen- bingzfungh, ranz daemqded laj bingzfungh hoenz hwnjneuneu, ciengz nding vax henj, laj vax miz boux geq ndeu, dinghdingh henhoh gij gyaeu- ndei neix, caj gou baez wnq daeuj cingqsaed yawjraen gij gyaeundei neix.

（gouj nienzgaep Lij Yijmungz)