“Sam nyied sam Bouxcuengh·doxiu youz Gvangjsih”dwg aen hoz- dung binjbaiz siuyungh vwnzva lijyouz“sam nyied sam Bouxcuengh·aen ciet hoengh Gvangjsih”ndawde yiengh hozdung daeuz ndeu（gungh miz haj yiengh）. Vihliux dazyinx hekyouz dieg wnq lailai daeuj Gvangjsih youz、laebdaeb hawj“vunz Gvangjsih youz Gvangjsih”hwnghoengh, Gvangjsih gaenxmaenx suenqveh, ok banhfap lumj bae baihrog lwnh vunzlai rox Gvangjsih、comz gak baih guh gij hozdung vwnzva lijyouz miz daeg- saek、hengz cwngcwz hawj vunz ndaejleih daengj, youq dangciengz caeuq gwnzvangj caemh haenqrengz, doinyoengx aen hozdung vwnzva lijyouz“doxiu youz Gvangjsih”guh hwng guh hoengh.

Duenh cuengqgyaj gvaq“sam nyied sam Bouxcuengh”, ndaw Gvangjsih gak aen gingjgih hung vunz cien vunz fanh, Gvangjsih gizgiz cungj miz vunzlai eu fwen goksasa doxgangj riuhaha. Ciuq vunz gyoepsuenq, duenh gyaj 4 ngoenz neix daengx Gvangjsih gungh ciepdaih hekyouz 1577.58 fanh vunzbaez, beij bi- gvaq caemh duenh gyalai 3.1%，lijyouz siuyungh bae 125.36 ik maenz, beij bi’gvaq caemh duenh gyalai 4.6%.（Vuz Libingz）