De yenzlaiz siengj caenndang buet daengz ranz Siu Cuh bae ra Siu Cuh, hoeng dak Buzsimjsam le, caemhcaiq hix cienz gij siusik camyah okbae, gyae’gyawj haujlai vunz cungj rox Lungz Byauh yawj hwnj Siu Cuh lo, cingq dak mehmoiz cam. Dangh- naeuz bonjfaenh youh buet bae caeuq Siu Cuh doxiu, mbouj dwg hawj vunz gangjriu ha? Ndigah seizneix de dauqfanj mbouj beij gaxgonq mbei- hung lo, yienznaeuz ndawsim gwq ngeix, cix itcig mbouj gamj seizbienh bae ra Siu Cuh.

Ngoenzde, Buzsimjsam youh bibi buengqbuengq daeuj daengz ranz Lungz Byauh lo, daxmeh de lumj dakdaih bouxhek youqgaenj nei cingj de naengh roengzdaeuj.

“Baenzlawz ne? Ranz de dwg maz eiqsei?”

“Gou cingq gangjfug ne!” Buz- simjsam riu dwk, aen bak hung miz song naed heujgim ronghmig lwenqda naeuz, “ranz de mbouj miz maz yigen, cij mbouj gvaq bohmeh de ngamq miz dah lwg ndeu, youh dwg lwg daih’it, coengmingz gaenx guh, gij saeh baihndaw baihrog caemhcaiq hung- hung iqiq dingzlai cungj dwg de guh. Caiq gangj lo, de lij iq, bohmeh de sij mbouj ndaej geijlai ha……”

“Buzsimjsam!” Lungz Byauh youq henz dingq ndaej mbouj naihfanz lo, gij vah Buzsimjsam boekbinq dauqdingq youh numqnumq menh- menh, hawj Lungz Byauh hozndat, fwt cap haeuj coenz haenq ndeu, “lwnh hawj mwngz, gou ciuh vunz neix itdingh aeu Siu Cuh guh yah, mboujnex couh mbouj aeu! Mbouj- guenj bohmeh de nyienh mbouj nyienh!”

(caengz sat)