Raeuz Bouxcuengh mbwksai

Gvaiq mbouj gvaiq

Boux beij boux daenj ndei

Saekyiengh saenz youh geiz

Mienhmauh saen

Daenj okbae seuqcengh

Swnghhoz saedcaih ndei

Seiz mbouj seiz

Youh guh ceiz suek faengx

Roxnaeuz guh haeuxnaengj

Caen dwg caen

Ngoenzngoenz dang gvaqcieng

Bya sang hix riunyumj

Yawj gwnzbiengz

Lumj ranghva mig yienh

Laeuz moq dauqcawq hwnj

Lajmbanj bienq

Gizgiz yienj fanzvaz

Haenqrengz guh gyauhdungh

Haij luz gungh

Lohloh doeng seizneix

Bae gyawz cungj bienhleih

Byaij cien leix

Hix yungzheih bae daengz

Raeuz miz rwzswnhrumz

Miz maz saeh

Couh heuhheuh geij coenz

Gaicawx yungh soujgih

Siengj doxraen

Hai sibinz couh ndaej

Seizneix seizdaih moq

Ndei dahraix

Gvaq ndaej lumj diegsien

Bouxsien sim hix humz

Daengz lajbiengz

Gvaq ndwenngoenz angqyangz

Gwn daenj youq okdou

Gij saeh hung

Cwngfuj gig yawjnaek

Fazcanj gig vaiqved

Ngoenzngoenz bienq

Angqyangz cienz fanhdaih