Ndaw gyang ndoengfaex miz duz cinglingzva ndeu, coh de heuh “vabienqsaek”.

Vabienqsaek daengx ndang hausagsag, cijmiz byoemgyaeuj dwg saekhenjgim, lumj riengz haeux- henj nei. De daenj buhrog hausag ronghcingx, gwnz buhrog miz gak cungj doz va nywj, gij saek de vava loegloeg. Ceiq saenzgeiz dwg gwnz rwz de cab miz diuz bwnroeg bienqsaek caet cungj saek ndeu, cijaeu yungh gaiq bwn neix diemjdiemj, doxgaiq deng de bungq deng haenx couh bienqbaenz gij saek de siengj aeu haenx. Gaiq bwn bienqsaek neix ndaej doenggvaq sou gij saek daswyenz, sawj sezswd vabienqsaek engq ak lo.

Seizcin, vabienqsaek aeu seizcin bienqbaenz saekhau; seizhah, vabienqsaek youh aeu va’ngaeux bienqbaenz saekhau; seizcou, gak cungj haeuxgwn demsou haenx hix deng bienqbaenz saekhau lo…… Youq ndawj gij geiqciet deng de senj deng haenx, cijaeu doxgaiq miz saek, cungj deng bienqbaenz saekhau. Yienghneix, sezswd vabienqsaek hix ngoenz beij ngoenz ak lo.

Gyoengqvunz caeuq gyoengq doenghduz youq ndaw ndoeng youq haenx, cungj mbouj gyaez duz cinglingzva bienqsaek neix, aenvih de cungj dwg hawj daihgya gvaq seizdoeng, cawzle saekhau nitcengx, gijmaz saek cungj mbouj miz, lienz daengngoenz cungj mbouj dwg ndinghoengz lo. Gyoengqvunz nit ndaej ndoj youq ndaw ranz, gyoengq doenghduz hix ngoenzngoenz suk youq ndaw rongz. Doiq gijneix, vabienqsaek gig daekeiq: Sou yawjyawj, gou geijlai miz bonjsaeh ha, dawz daengx biengz cungj bienqbaenz saekhau, ak lai bw! Vabienqsaek daekeiq dwk fwngz foux din diuq, boux dog youq ndaw ndoeng mbin bae mbin dauq.

Hoeng menhmenh dwk, vabienqsaek mumj- gyumq roxnyinh daengz gagdog lo—— mbouj miz vunz swt de, de hix yied daeuj yied roxnyinh daengz cungj saedceij neix mbouj miz gijmaz eiqsei.

Vabienqsaek roebdaengz buz geq cingq gip fwnz he, de cam: “Daxbuz, vihmaz daihgya cungj mbouj swt gou ne?” Buzgeq riumbwng naeuz: “Aenvih mwngz dawz sojmiz saek cungj bienq hau lo, hawj gwndaenj dou gig mbouj fueng- bienh……” “Yienghneix baenzlawz cij ndaej hawj daihgya maij gou ne?” Vabienqsaek gip dwk cam. Daxbuz han naeuz:“Cijaeu mwngz dawz sojmiz saek boiz hawj daswyenz couh ndaej lo, gij saek neix cungj dwg gvi daihgya.” Vabienqsaek itseiz mbouj rox gangj gijmaz lo, caem yaep ndeu le naeuz: “Gyo’mbaiq mwngz!”

Seizdoeng gvaqbae seizcin daeujdaengz, vabienqsaek cingjcingj naemj aen seizdoeng ndeu, doeklaeng guh’ok aen gietdingh youqgaenj ndeu—— de yaek dawz gij saek gyaeundei cungj boiz hawj daihgya: De byaij daengz henz gofaex hung, aeu gaiqbwn gwnz rwz yaengyaeng diemj mbat ndeu, ndoengfaex sikhaek bienq lumj doenghbaez heuyau lo; de youh daeujdaengz henz suenva, aeu gaiqbwn yaeng’yaeng bungq mbat he, gak saek va dauqcungz hai lo, saek de ndeiyawj dangqmaz; de youh mbin daengz suenmak, dawz gaiqbwn yaeng’yaeng fid mbat ndeu, gomak sikhaek did ngaz、hai va…… vabienqsaek dawz gij saek cungj boiz hawj daihgya caez lo. Gyoengqvunz okdou fwdfwd haenx cungj riunyumj coh de, miz mbangj lij bekfwngz haenh de. Vabienqsaek gamjsouh daengz raeujrub caeuq angqyangz de caengz gamjsouh daengz gvaq haenx: Roegvenz cawjdoengh gvaqdaeuj dongx de, gyoengq lwgnyez cungj buet gvaqdaeuj siengj caeuq de guhcaemz; buzgeq dawz ceiz caet cungj saek caenfwngz guh haenx soengq hawj vabienqsaek ……

Vabienqsaek angq lai lo, de daj neix caiq hix mbouj soucomz saek lo, aenvih de rox aen dauhleix ndeu: Sezswd ak lai cix mbouj ndaej sawj de angqyangz, hawj daihgya angq cij dwg caencingq angqyangz.

(roek nienzgaep Muyungz Cunghyuij)