“Duz moegyou geijlai yinxdaeuz ha!” Doeg le bonj saw《Geiq Moegyou Geizraeb》neix, gou deng Biznozcauz cabheiq caeuq aengoj majhung de haeujyinx lo.

Aengoj《Geiq Moegyou Geizraeb》miz- yinx dangqmaz. Ndaw saw gangj moegyou iq Biznozcauz baenzngoenz gangj vahgyaj, de vihliux okbae guhcaemz, mbouj haengj bae hagdangz doegsaw, dawz cienz cawx gobwnj bae cawx biuq yawj heiq, aenvih gaujluenh gij yenjcuz heiqciengz, de deng lauxbanj gaemh hwnjdaeuj lo .

Lauxbanj cuengq de okdaeuj le, de youq ndawbiengz louzlangh, sien bungz daengz caeggeq, cengdi dai bae, doeklaeng ndaej dahsien gouq de. De aenvih dam guhcaemz youh deng vunzvaih yaeuh bae “guek- fouzyou” guhcaemz geij ndwen, doeklaeng bienqbaenz duzlawz huk ndeu. De ginggvaq haujlai dwgrengz sinhoj cij deuz ndaej bae ndaw haij, youh deng duz byasahyiz gyan roengz dungx bae, saehcingz siengj mbouj daengz haenx fatseng lo: De gingqyienz youq ndaw dungx byasahyiz bungzdaengz daxboh, bohlwg song boux caezsim deuz okbae. Doeklaeng Biznozcauz bienqbaenz boux lwgnyez caencingq lauxsaed、maenh’ak、gyaez bang vunz ndeu.

Gij ginglig majhung Biznozcauz lwnh raeuz nyi, cijmiz lauxsaed, bouxwnq cij caeuq mwngz doxndei. Doeg bonj saw neix le, caiq siengjsiengj swhgeij, gou roxnyinh gig ienqhoij.

Geiq ndaej miz baez ndeu, gou caeuq daegnuengx youq ndaw ranz guhcaemz, mbouj siujsim deng aencenj doek gwnz dieg vaih lo. Gou caeuq daegnuengx vaiqvet baet seuq bae. Daxmeh ma ranz ra mbouj raen aencenj, cam gou aencenj bae gizlawz, gou naeuz “mbouj rox”. Daxmeh raen ndaw doengj nyapnyaj miz meng soiq, gou yousim “rumzhaenq fwnraq” yaek daeujdaengz, hoeng daxmeh mbouj fatheiq. Cij dwg vahnaek cingzlaeg doiq gou naeuz:“Guh vunz aeu lauxsaed, daj iq couh aeu youq ndawsim swhgeij ndaem naed ceh lauxsaed ndeu.” Dangseiz gou lij mbouj rox gij vah neix dwg maz eiqsei. Seizneix doeg le bonjsaw《Geiq Moegyou Geizraeb》, gou dauqdaej rox gij vah daxmeh lo. Gvaqlaeng gou itdingh mbouj caiq gangj vahgyaj lo, youq gwnz roen seiqvunz, raeuz aeu guh bouxvunz lauxsaed.

Seizneix gou gawj bonj saw neix hawj daihgya, daihgya hix daeuj doegdoeg ba.

(boux lauxsae son’gyauq Liengz Haijyangz)