De najnyaeuq byaij roengz bya bae, byaij gvaq bakdou ranz Siu Cuh. Hoeng baihnaj ranz de hoengqvagvag, fajdou haep maenh, lienz duz ma haenx hix mbouj raen lo. Gyang doengh cienz daeuj gij sing loih haeux, de rox seizneix caezgya haengjdingh nyaengq gvej haeux. Hoeng, youh mbouj rox gaiq naz ranz Siu Cuh youq gyawz, mboujnex, de caen siengj buet daengz haenz naz bae yawj de gvej haeux bw.

Seizhong gvaqbae lo, mbwn menhmenh caemx roengzdaeuj, hoeng gij baksieng Lungz Byauh—— aen congh haenx gwq lae raemxnong, mbouj caengz homq, gij ndangnoh seiqhenz bienqbaenz saekaeuj, youq gyanghwnz humz ndaej de aeu fwngz bae gaeu, baez gaeu youh in. Danghnaeuz dawz ywdoj ok, sikhaek miz nengznyaen mbin gvaqdaeuj, gig dwgcaengz, gyoengq lwgnyez ndaw mbanj couh hwnj aen vamingz hawj de, heuh de guh “Ga’naeuhbyauh”.

Mboujgvaq, “Ga’naeuhbyauh” hix ndei, “Dinnaeuhbyauh” hix baenz, Lungz Byauh cungj mbouj dawz doenghgij vamingz haeuj sim, ceiq hawj de simgip dwg Buzsimjsam. Buzsimjsam soqlaiz bak gvai, hoeng de bang Lungz Byauh guhmoiz lumjnaeuz gig mbouj swnh, geij ndwen gvaqbae lo, itcig mbouj miz maz vah dingh, Lungz Byauh doiq de gig mbouj habhoz.(caengz sat)