Ranzmbanj gou youq henz Dah- cojgyangh. Gij raemxdah sawdikdik, daj Lungzcouh、Gyanghcouh daengj dieg diuzdah baihgwnz lae roengz- daeuj, heux ranzmbanj gou gvaengz ndeu le, coh baihdoeng lae bae. Duenh dah baihlaj lae gvaq Fuzsuih、Yangzmeij daengj dieg. Caiq roengz- bae, youq Nanzningz Si Gyanghnanz Gih Gyanghsih Cin Mbanjsung caeuq Dahyougyangh doxhab, couh gap baenz Dahyunghgyangh lo.

Youq gij nienzdaih gyaudoeng mbouj fatdad, diuzdah dwg diuz roenloh gig youqgaenj vunz baedauq. Youq mwh aen sigij gonq 70 nienzdaih satbyai, gou ngamq ndaej roek caet bi, ciengzseiz caeuq gyoengq doengzdoih bae henz dah guhcaemz, raen gij ruzfaex youq gyang dah baebae dauqdauq. Seizde, mbouj caengz miz caizyouz fazdunggih guh doenghlig, ruzfaex lij dwg baengh venj fanzbu hawj rumz ci roxnaeuz aeu vunz vad cauh byaij. Youq laj fwjhaemh, gij nditrongh ciuq roengz gwnz mienhraemx bae ronghsagsag. Gwnz ruz bouxdwkbya menhmenh roengz muengx, gyang dah caem- rwgrwg, cwxcaih raixcaix. Dou ciengzseiz youq henz dah yawj gij ruz, mizseiz lij vut rin iq bae gyaep aen ruz. Gij vunz gwnz ruz hat ndaq dou geij coenz, dou doq buetdeuz.

Danghnaeuz aen ruz nyig raemx byaij doxhwnj, boux canghruz couh dwgrengz lai lo. Daegbied dwg Dahcojgyangh duenh henz mbanj gou miz geij giz gaebgedged, raemx lae ndaej goenjhumhum, henz dah gij rin daengjsak. Ruz byaij daengz gizde, gyoengq canghruz dwgrengz vad cauh. Roxnaeuz geij bouxvunz ndwn youq henz ruz, yungh diuz faexsaux dengj gij rin henz dah, roengzrengz cengj hawj ruz byaij. Gij rin henz dah miz haujlai congh lumj mehfwngz hung, couhdwg doenghboux canghruz ciengzgeiz aeu faexsaux dengjcengj ndaej baenz bw. Danghnaeuz saedcaih cengj mbouj ndaej, canghruz cijndaej roengz ruz hwnj hamq dah bae beng cag lo. Gyoengqde sam haj boux guh cuj ndeu, daep hwnj diuz cag, gungj hwet yunghrengz beng cag. Gyoengqde doq beng doq hemq “yiyi yoyo”, dwgrengz byaij baenaj. Aen ruz byaij numh gvaq duz saehaexma bae.

“Nyez ndoeng mbouj lau duz manaez, nyez dah haengjgyaez bae youzraemx”. Lwgnyez youq henz dah majhung, daegbied dwg boux lwgsai, gyaez youzraemx dangqmaz. Miz mbangj bouxsai hung doiq dou naeuz:“Gyoengqsou yaek hag rox youzraemx lwi? Gou miz aen ‘boiqfueng’ ndeu, hawj sou sikhaek rox youzraemx bw.” Gizsaed, gij “boiqfueng” couhdwg aeu duz biengzbeih daeuj haeb saejndw, yienghneix couh rox youzraemx lo. Dou huk ha, gingqyienz bae saenq gij vah neix, caen bae aeu duz biengzbeih ndeu daeuj haeb saejndw bonjfaenh, saejndw in raixcaix, nyaenx ndaej gyoengq vunzsai hung youq henzrik riu ndaej saej yaek gienj. Dou sien youq aen daemz ndaw mbanj hag youzraemx, menhmenh caiq dauq gizfeuh henz dah bae youzraemx. Caengz ndaej 6 bi, dou couh gag rox youzraemx lo.

Seizhah ndit ndat, mbwn hwngq- fwdfwd, banringz cuengqhag dauqma, dou mizseiz mbouj gwn cuk, couh buet bae henz dah caemz raemx gonq. Dou daengz henz dah, duet buhvaq liux diuq roengz raemx bae, ndaem raemx geij miux cung, daengx ndang liengz- swgswg, ndeiyouq raixcaix. Dou yaep he fouz youq gwnz raemx, yaep he doxbeij ndaem raemx yawj byawz ndaem ndaej nanz. Roxnaeuz ndwn youq gwnz hamq hag gij yiengh boux yindungyenz ndaw densi daj gizsang diuq roengz raemx bae, roxnaeuz youq ndaw dah “hoenxciengq”, song ga caij raemx, fwngzgvaz fwngzswix caez doxbaeuh raemx, angqyangz raixcaix.

Geiq ndaej mwh doeg siujyoz seiq haj nienzgaep, miz haemh ndeu dou geij boux doengzdoih doengzcaez bae henz dah youzraemx, iekdingh youz gvaq hamq doiqmienh mbanj wnq bae. Seizde, gwnzmbwn laepcupcup, seiqhenz gyang dah caemrikrik, cij dingqnyi gij raemxdah laesasa, yawj roengz ndaw raemx bae, hix dwg laepcupcup, mbouj rox geijlai laeg. Naemj daengz vunzhung cienznaeuz ndaw dah miz gij fangzgvaiq gwn vunz, roxnyinh gig dwglau. Gou lau ndaej sim diuqbubbub, mbouj gamj yawj ndaw raemx bae. Dou cijndaej daih- sing gangjriu, hawj bonjfaenh cengq- mbei. Mwh youz dauqma seiz, dou cungj buekmingh youz, lau youq baihlaeng deng fangzgvaiq gwn. Mwh youz dauq lo, dou sim’angq dangq- maz. Daengz seizneix, dauqngeix gij saeh vanzlij hawj bonhfaenh dwglau lai, seizneix caiq hawj gou 10 aen mbei, hix mbouj gamj guh gij saeh neix.

Engq hawj vunz danqhaenh Dah- cojgyangh vanzlij dwg diuz dah miz gij saenzgeiz vwnzva Lozyez ciuhgeq ndeu. Youq gwnz bangxdat henz dah miz 200 lai goengleix raez, miz gij dozveh dijbauj lwgminz ciuqgeq Bouxcuengh louz roengzdaeuj. Ranz- mbanj gou youq Fuzsuih Yen Gizliz Cin Mbanjsinh’anh, youq gwnz bangxdat Byagamjvaiz caeuq Byadah- daemq, gak miz giz dozveh bangxdat ndeu. Dahcojgyangh gungh miz dozveh bangxdat 79 aen gingjdiemj、179 giz、280 cuj. Gij dozveh bangxdat youq gwnz henz dah, gij siengqvunz miz hung miz iq, mizmbangj gaem cax gaem giemq, mizmbangj gwih max, mizmbangj dwknyaen. Gij ciengz- mienh miz dwkbaiq diendeih, miz angqhoh demsou, miz ciengqgo diuq- foux, nauhyied raixcaix. Yienznaeuz ginggvaq geij cien bi daeuj rumz ci ndit dak fwn rwed, gij dozveh vanzlij saekcaij ronghsagsag, hawj vunz roxnyinh geizheih lai lo.

Engq hawj vunz roxnyinh geiz- heih dwg gij bangxdat duzlingz cungj hoj benz, cojcoeng Bouxcuengh raeuz baenzlawz benz hwnjbae dajveh ne? Gyoengqde youh yungh maz caizliuh bae dajveh hawj ndaej gij dozveh bangxdat gvaq geij cien bi rumz ci fwn rwed cix saekcaij mbouj doiq ne? Gij dozveh bangxdat youh dajveh maz ne? Gij maezdaej hoj gej neix, lumj cek sawmbwn mbouj miz cih na’noeknoek nei, ce hawj ciuhlaeng raeuz ngeix mbouj rox, hawj gij dozveh bangxdat cw le caengz saekcaij saenzmaed ndeu, yinx vunz seiqseiq daihdaih bae ngeix bae lwnh.

Geij bi neix daeuj, haifat Cojgyangh goenjfoedfoed, youq duenh dah baihgwnz gizgyawj mbanj gou, hwnjguh Sanhsiu Suijdencan, youq duenh dah baihlaj henz Nanzningz Si hwnjguh Laujgouj Suijli Suhniuj Gunghcwngz, daihlig haifat gij suij- nwngz Cojgyangh. Bi 2015, Gozvuyen roengzfat 《Gij Baefuk Gvendaengz Dahcojyougyangh Gwzming Laujgih Saenqhwng Gveihva》, hawj gij dieg- fueng Dahcojgyangh lae gvaq hwngfat ndaej dem rengz moq. Nyienh Dahcojgyangh ndaej gej hai aen saenzmaed, ndaej bienqbaenz aen “vehlangz hung bak leix bya raemx”、diuz “roen raemx saekgim”, hwngfat lijyouz canjnieb caeuq gyaudoeng dajyinh canjnieb, ndaej bienqbaenz “diuzdah vuenyungz”.