Yienghneix, Mehlungzbyauh bae ra Buzsimjsam boux cienmonz youq gyae’gyawj guhmoiz haenx, Buz- simjsam hainduj baedauq song ranz neix, yaek naemj caeuxdi guh baenz dan moiz neix, hix ndei bae gwn laeuj, aeu faenh ngaenz guhmoiz.

Seizneix Lungz Byauh yienznaeuz gij baksieng caengz ndei, hoeng de gig angq, bouxgyaez seiz mbouj seiz ndaej youq ndaw fangzhwnz loqraen, henz dah saeg buh, gwnz bya gvej nya, saeh gaxgonq gienhgienh dauqngeix, lumj diuz dah gaeuznyeunyeu caemhcaiq homfwdfwd he, youq ndawsim de hwnzngoenz lae mbouj dingz.

Daxmeh de hix hainduj guh cinjbi coux lwgbawx lo, daj mbanj- nden cawx ndaej song duz moulwg, caeuq daxau ndaw gyog cawx le song duz yiengzlwg, dajsuenq ciengx gyoengq doihduz neix hung lo, cingqngamj daengz ngoenz coux lwgbawx banh laeuj gaj gwn. Aen ranz neix yienznaeuz cij miz song mehlwg, hoeng hix angqfwngfwng.

Gij baksieng gahengh Lungz Byauh haenx gaenq mbouj gawh lo, ywdoj cix cimqnduk gij baksieng baenz aen congh hung gvaq doengz- cienz, gwq lae raemxnong saekhoengz caeuq saekhau. Aenvih deng sieng youq giz gyangndok gahengh, gig nanz ndei, ndigah gwq oep dwk ywdoj, hawj Lungz Byauh gig mbouj cwxcaih.

Mboujgvaq, gij baksieng haenx mbouj yingjyangj de gwn ninz byaij roen, vihliux mbouj caiq baenzneix mbwq, de youh hwnj bya bae ra Siu Cuh. Hoeng, mwhneix ngamq daengz seizcou, cingq dwg seiz youq ndaw naz gvej haeux nyaengqnyatnyat. Gyoengq dahsau camhseiz mbouj youq gwnz bya gvej nya lo, cij miz bya faex ciuqgaeuq, cix noix le gij ngaeuz Siu Cuh. Lungz Byauh youq laj go faexhung haenx gvaeh ndaej haujlai nanz, youh yawjyawj ranghdieg deng Siu Cuh raemj gvej haenx, lw miz mbangj goek rum goenq faexcaz raez dinj mbouj doxdoengz, lumj youq ndaw bouqdaeqgyaeuj raen aen gyaeuj deng fagdaeq ngoemx daeq nei.

(caengz sat)