Gangj daengz gij binghgizlinz rox ok oenq, lauheiq mwngz roxnyinh geizheih lai lo, binghgizlinz mbouj dwg gyoetbyambyam ma, baenzlawz miz oenq ne? Aen gojgaeq lij aeu daj aen seizhah 5 bi gonq gangj hwnj cijndaej bw.

5 bi gonq seizhah, Dahvaz youq ndaw mbanj rungh doeg siujyoz it nienzgaep, geizbyai gaujsi, de gauj ndaej mingz daih’it ndaw ban, bungj mbaw ciengjcang he angqvauvau buet maranz. Daxboh cam de naeuz siengj aeu maz ciengjli? Dahvaz gik- doengh naeuz siengj gwn binghgizlinz, hoeng seizde ndawranz mbouj miz binghgizlinz, daxboh cij ndaej dap- wngq de ngoenz lawz bae haw caiq cawx maranz. Doeklaeng Dahvaz lij caeuq daxboh rag fwngzlwg gangj dingh gvaq ne.

Dahvaz lij caengz ndaej gwn binghgizlinz gvaq, cij dingqgangj naeuz binghgizlinz gig ndeigwn.

Hainduj geij ngoenz, Dahvaz cungj mbouj dingz mbouj duenh cam daxboh seiz lawz cij ndaej bae haw cawx binghgizlinz? Vihneix, daxboh Dahvaz geij ngoenz de cungj dwg hwnj bya bae ra huq bya. Sinhoj le geij ngoenz, cij ra ndaej di ywdoj caeuq gaeb ndaej 3 duzhaet.

Ngoenz daihhaj dwg ngoenz haw, haetromh, daxboh yaek haeuj singz bae gai huq bya lo, Dahvaz caeux- caeux couh hwnq congz yaek gaen daxboh bae haw, hoeng daxboh naeuz ndaw haw liz ranz gyae lai lo, roen bya youh nanz byaij raixcaix, mbouj hawj Dahvaz gaenlaeng. Dahvaz youh daengq sam daengq seiq daxboh naeuz cienfanh gaej lumz cawx binghgizlinz. Daxboh han de naeuz ngoenzneix itdingh cawx binghgizlinz ma. Siengj daengz yaek ndaej gwn binghgizlinz lo, naj Dahvaz riu baenz lumj duj va ngamq hai nei. Daxboh byaij gij loh bya coh gwnz haw, Dahvaz ndwn youq bakmbanj lwgda soengq daxboh, itcig daengz yawj mbouj raen aen ngaeuz daxboh le cij maranz.

Banringz, ndit manhsaengsaeng, hoeng siengj daengz gij binghgizlinz ndeigwn haenx, ndaw sim Dahvaz angqvauvau、 diemzsubsub bae, gij myaiz ndaw bak de nyaenx mbouj ndaej lae okdaeuj, de youh doq ndwnj roengz hoz bae. De soemh ndit ndatfwdfwd, daeuj daengz laj go- nganx bakmbanj ngiengxgyaeuj coh diuz roen bya ngutngut ngeungeu lumj saej duzyiengz nei yawj bae yawj dauq, muengh daxboh de vaiqdi daj gwnz haw dauqma, ndaej daiq dauq gij binghgizlinz de muengh haujlai nanz, de roxnyinh lumjbaenz miz duznon ngah gwn he youq ndaw conghhoz bonjfaenh mbouj dingz ningnwdnwd, ndwnj myaiz baez dem baez. Duzbid youq gwnz nyefaex miz heiq fouz rengz heuhngenge, hawj vunz baiqninz, deq hwnj deq roengz, daengngoenz doek congh, ronghndwen benz hwnj dingj- bya lo.

Daxboh dauqdaej dauqma lo, daengx gyaeuj hanh lae ndang dumz. Dahvaz deq mbouj gib cam naeuz:“Daxboh, binghgizlinz mwngz cawx ma lwi?” Daxboh angqfwngfwng ndenq hawj de aen habhaeux he, naeuz:“Binghgizlinz couh youq ndaw.” Dahvaz baez dingq couh diuq hwnj- daeuj, seizneix de roxnyinh bonjfaenh dwg boux lwgnyez gwnz biengz ceiq vuenyungz he, nyaenx mbouj ndaej ciengq go hwnjdaeuj. Hoeng mbehai aen habhaeux seiz, cix saetmuengh hemq hwnjdaeuj:“Daxboh, mwngz cawx gij binghgizlinz youq gyawz ha? Hw, mwngz yaeuh gou, mwngz yaeuh gou……”Dahvaz doeknaiq daej- nganga hwnjdaeuj.

Yawj coh dahlwg raemxda hoij youq gwnz naj baenzlai, daxboh dawz habhaeux baez yawj, sawqmwh ngawz caez lo, 5 aen binghgizlinz cawx ma haenx, aenvih dienheiq ndat lai, youh byaij le cibgeij leix roen bya, gaenq yungz baenz raemx caez lo.

Raen dahlwg baenzneix saet- muengh baenzneix nanzgvaq, de riu hix mbouj ndaej, daej hix mbouj dwg. Baenzlawz gejnaeuz hix mbouj cing- cuj, cij ndaej lumh dawz aen gyaeuj Dahvaz gangj naeuz:“Dahlwg gvai gou ha, daxboh cawx lo, hoeng gyoengqde yungz bae lo. Mbanj raeuz youq ndaw lueg, liz gwnz haw gyae lai lo, loh bya gumzgamx, mbouj doeng ci, daj gwnz haw dauq aeu byaij geij aen cungdaeuz roen bya, danghnaeuz raeuz youq ndaw singz miz aen ranz……

Haemhde, Dahvaz gwn mbouj roengz doxgaiq maz couh haeuj rug bae lo, daj seizhaenx hwnj, ndaej gwn gij binghgizlinz couh baenz le gij simmuengh de. De ciengzseiz guh fangzhwnzloq, loqraen ranz de ndaej youq ndaw singz cawx ranz, swhgeij hix ndaej youq ndaw singz doegsaw, ndaej gwn daengz gij binghgizlinz ngamq daj ndaw binghsiengh dawz okdaeuj, myaiz lihliklik. Moix baez loq fangzhwnz singj le couh caeuq daxboh lwnh naeuz gij saeh de loqraen, daxboh gujli de naeuz, cijaeu roengz- rengz hag doxgaiq daengzcog couh ndaej youq ndaw singz cawx aen ranz duh bonjfaenh bw.

Saedceij couh baenzneix mbouj gaenj mbouj menh gvaqbae, Dahvaz geijlai maqmuengh swhgeij ndaej caeuxdi youq ndaw singz miz aen ranz swhgeij ha, miz ranz le de couh ndaej gwn gij binghgizlinz ngamq daj ndaw binghsiengh dawz okdaeuj lo.

3 bi gaxgonq, guekgya raeuz saedhengz cingcinj banggungz, vih bang gyoengq bouxgungz duetgungz, saedhengz gij cwngcwz senj dieg buen ranz bouxgungz, daj ndaw rungh ndaw bya buen okrog daeuj, ranz Dahvaz couh ndaej buen daengz aen siujgih ndaw singz cwngfuj senj dieg hwnj ranzlaeuz moq bae youq.

Dahvaz caeuq daegnuengx de ndaej youq aen hagdangz ndaw siujgih hwnjhag. Daxmeh haeuj aen cehgenh siujgih banggungz bae guhhong. Daxboh ndaej ganbu bangfuz bangcoh, hag rox gij gisuz, bae aen gunghcangj guh dou, aen gunghcangj liz siujgih mbouj gyae. Daj seizneix hwnj, ndaw ranz souhaeuj couh bienq lai caemhcaiq onjdingh lo.

Bineix seizhah, Dahvaz youq geizbyai gaujsi youh gauj ndaej mingz daih’it ndaw ban, ngoenzde, daxboh Dahvaz daj ndaw binghsiengh ndaw- ranz dawz aen binghgizlinz okdaeuj dajciengj de.

Ndaw ding ronghsagsag ranz moq, caezgya humx naengh youq sahfaz yawj densi. Dahvaz aeu linx riz gij binghgizlinz gyoetgyatgyat, de angq ndaej naeuz gij binghgizlinz ok oenq neix caen ndeigwn ha! Raen de baenzneix sim’angq, daengx ranz vunz hix angqvauvau, caiq siengj hwnj aen seizhah 5 bi gonq haenx, daxboh roxnyinh seizneix gij ndwenngoenz bonjfaenh lumj youq diegsien nei, gaxgonq baenzlawz hix mbouj gamj siengj.

Dahvaz roxnyinh daengz seiz- neix swhgeij dwg geijlai vuenyungz ha, de nyaenx mbouj ndaej ciengq go gag bien: Angqangq fofo daeh doxgaiq haeuj ranz moq, angqangq fofo aemq daehsaw hwnj hagdangz moq, gij binghgizlinz moq rox ok oenq neix baenzlai ndeigwn……