Makmaenj hai va hau,

Makdauz angj va maeq,

Baez daengz mbwn raeuj seiz,

Vuenheij daeuj eufwen.

Baez daengz mbwn raeuj seiz,

Roegrek ci seizcin,

Daengngoenz dak gorim,

Biu mbaw bin daengx go.

Roegrek ci seizcin,

Sing fwen rim mbaeklae,

Sam nyied vadauz hai,

Cungj dap daiz eu fwen.

Gonq bouxlaux goj naeuz,

Cienz raeuz daih youh daih,

Gwnz saw hix miz raiz,

Seiqgyaiq cungj rox mingz.

Gonq miz Liuz Samcej,

Louz roengz ceh eufwen,

Raeuz Bouxcuengh cungj cienz,

Mbouj ndaej gveng aeu geiq.

Sam nyied raemx haeuj naz,

Gwnz bya roeg ci cin,

Gwnz nga vadauz rim,

Ndawsim caen angqyangz.

Mbwk sai caez eu fwen,

Cingzngeih cienz doxbae,

Beij diuz dah lij raez,

Gig simmaez doxaeu.

Sam nyied seizcin daengz,

Vadauz daengx bo hai,

Bouxcuengh raeuz mbwk sai,

Bouxboux maij eufwen.