Seizneix mbwn menh raeuj,

Rumzcin daeuj feifei,

Raeuz gvaq ndei saedceij,

Aeu gaenx geiq daxboh.

Dang boh mbouj yungzheih,

Feiq simgei baenzlai,

Lij iq gueng raeuz ngaiz,

Guh hong lai gvaq ngoenz.

Bi daengz bi haicin,

Youh aeu singj hongnaz,

Haemh dajcae haeuj ma,

Dangzvaq lij uq boengz.

Mbwn’wenj couh okbae,

Muengz ndaej lumj gyangq baenq,

Ngoenz guh daengz mbwn haemh,

Gwn haemz youh gwn hoj.

Mbwn laep caemngaungau,

Boh ngamq dauq haeuj ranz,

Vih ciengx gyoengq lwglan,

Vaiq gwn can youh muengz.

Son lwg byaij deng laemx,

Youh naemj gaem hwnj mbaq,

Lwg iq daejgaga,

Cuengq gwnz mbaq bae youz.

Vih aen ranz daihsaeh,

Ra ngaenzceij dauqma,

Vih ciengx lwg ciengx gya,

Guh naz youh guh reih.

Ciengx lwg mbouj yungzheih,

Dou cungj geiq ndaw hoz,

Boh guh hong sinhoj,

Raeuz aeu rox ndaej daengz.

Ngoenzngoenz baenzneix caeux,

Youh hwnqdaeuj okbae,

Daengngoenz doek baihsae,

De ngamq ndaej dauqma.

Baez naemj daengz boh gou,

Ok bak gou youh geiq,

Cae naz youh cae reih,

Cungj ndaej gvaq fwngz boh.

Baez hai hong ndaw reih,

Cungj muengz mbouj ndaejhoengq,

Daengngoenz gaenq doek roengz,

Boh lij boenq hongnaz.

Lij iq mbouj roxsoq,

Mbouj rox gyaez bouxlaux,

Seiz hung naemj doxdauq,

Raeuz aeu bauq aencingz.

Vih ciengx lwg majhung,

Lai bi cungj sinhoj,

Gaxgonq mbouj roxsoq,

Cungj mbouj rox gyaez boh.

Ngoenz guh naz guh reih,

Boh baezneix dwgrengz,

Gij cingz beij gim bengz,

Raeuz aeu engq hauqgingq.

Ciengx lwg maj hwnjdaeuj,

Youh aeu son roxlaex,

Guh boh mbouj yungzheih,

Aeu youheiq baenzlai.

Ciengx lwg hung hwnjdaeuj,

Caux gya youh caux ranz,

Bouxboux caez angqyangz,

Boh ndang baeg mbouj naeuz.

Boh ciengx lwg sinhoj,

Raeuz aeu rox ndaej daengz,

Miz nanh de youq laeng,

Aeu boiz aen bouxlaux.

Miz daxboh guh goek,

Fanh hoj gyoep baenz diemz,

Baenzbaenz cungj mbouj yiemz,

Yien fwngz buenx de geq.