Bonjbauq siusik（gicej Liengz Cingz）Hawj vunzlai cungj nyinh Cunghvaz Minzcuz caezcaemh dwg diuz sienqmeh youq seizdaih moq guh hong minzcuz, bi’gyai、bi’gvaq、bineix sam bi doxriengz ndaw《Cwngfuj Gunghcoz Baugau》 raiz“hawj vunzlai cungj nyinh Cunghvaz Minzcuz caezcaemh”haeuj ndaw dajsuenq hong minzcuz daengx bi. Bineix dwg bi hwnjdin duenh“cibseiq haj”, youq mwh seizdaih moq heijdaeuz, Gvangj- sih Minzcunghveij baenzlawz youq bineix bingzciengz guhhong ndawde hawj vunzlai cungj nyinh Cunghvaz Minzcuz caezcaemh? Hopheux aen vahdaez neix, gicej cam le boux- daibyauj Daengx Guek Yinzda, Sw- cigih Dangjveij Dungjcanbu fubu- cangj, Swcigih Minzcunghveij Dangj- cuj suhgi、cujyin, Swcigih Minzyijveij cujyin Banh Cunghbwz.

“Youq bimoq neix, raeuz yaek ciuq Aen Swhsiengj Sevei Cujyi Miz Daegsaek Cungguek Seizdaih Moq Siz Ginbingz vixyinx, hag lai laeg ngeix lai doh gij vah youqgaenj Siz Ginbingz gangj baenzlawz guh hong minzcuz de, youq seizdaih moq guh hong minzcuz, aeu hawj vunzlai cungj nyinh Cunghvaz Minzcuz caezcaemh, dangq neix baenz diuz sienqmeh caeuq aen yinvu baenz canloz ndeu.”Banh Cunghbwz naeuz,“It dwg guh ndei hong hagrox、 senhconz、ciuqhengz《Aen Diuzlaeh Hong Dungjyiz Cansen》, gyaak dangj gyonjcomz doengjit daiqlingx hong minzcuz. Ngeih dwg yungh ndei‘gaiqfaex vixyinx’couhdwg dagrau hongbaenz cienhangh guh minzcuz doxgiet baenaj de, hwnqguh Gvangjsih aen gih yienghbanj minzcuz doxgiet baenaj neix lai ndei. Sam dwg laebhwnj aen gihci guhhong caemhcaiq hawj de caezcienz, fuengzre vaqgej gij fung- yiemj caeuq huqhaih ndumj ndaw hongsaeh minzcuz.”